Җинаятьчелектән райондашларны бары профилактика ярдәмендә генә саклап була

Актаныш районындагы криминоген хәл, хокук бозулар һәм җинаятьчелеккә каршы профилактика эше турында комиссия утырышында катнашучыларны Россия Эчке эшләр министрлыгының Актаныш районы буенча бүлеге җитәкчесе Рәдиф Баһавиев таныштырды. 2024 елның өч аенда Актаныш районында куркыныч җинаятьләр теркәлмәгән. Шушы чорда Эчке эшләр бүлегенә 1083 хәбәр кергән. 91 җинаять теркәлгән , аларның 47се тикшерелгән, 29ы туктатылган. Ачылмаган җинаятьләр арасында зур күпчелекне дистанцион характердагылар тәшкил итә. 29 эшнең 26сы читтән торып, IT-технологияләр кулланып кылынган. Рәдиф Җәүдәт улы җинаятьләрнең структуралары, аны кылучылар, җәмәгать урыннарында кылынган хокук бозулар, мигрантлар белән эшчәнлек хакында җентекләп сөйләде.

Утырыш эшендә район башкарма комитет җитәкчесенең социаль мәсьәләләр буенча урынбасары Дилбәр Әнвәрова, мәгариф идарәсе башлыгы Раниза Шакирова, район башлыгы урынбасары Илшат Габдулхаев мөһим мәсьәләләр буенча чыгыш ясады. 

Район башлыгы Ленар Зарипов чыгышлардан соң үзенең фикер-тәкъдимнәрен җиткерде. Райондашларыбызны хокук бозулардан, җинаятьчелектән бары тик профилактика ярдәмендә генә коткарып калып булуын әйтте.

Комиссия утырышы турында тулырак алдагы язмаларда яктыртачакбыз.