Урып-җыюда катнашкан комбайннарның янгыннан саклану буенча җиһазланышы тикшерелде

103 янгын сакчылыгы бүлеге җитәкчесе урынбасары Мияссәр Зарипов белән Актаныш һәм Минзәлә районара янгын күзәтчелеге өлкән инспекторы Марат Арсланов бүген хуҗалыкларда булып механизаторлар белән аралаштылар, комбайннарның янгыннан саклану чаралары белән җиһазланышын тикшерделәр.
Бөртекле культуралар чәчелгән кырларда янгын чыгу иң җитди һәм куркыныч проблема  санала, чөнки салам һәм бөртеклеләр чүмәләсе— җиңел кабынып китә торган масса. 
 Урып-җыю техникасы, агрегатлар һәм автомобильләр төзек хәлдә файдаланылырга тиеш. Ашлык җыю агрегатлары беренчел янгын сүндерү чаралары белән комплектлана (комбайннар һәм тракторларда — ике янгынсүндергеч, ике штык көрәге, ике себерке; автомобильләрдә — янгынсүндергеч һәм штык көрәге). Комбайннар токны җиргә җибәрү җайланмалары белән җиһазландырылырга тиеш.