КӨЗГЕ КАНИКУЛЛАР ДӘВАМ ИТӘ: Әти-әниләргә киңәшләр

Бергәләп пешерү

Көзге салкын көннәрдә өйдә пешерелгән ризык белән тәмләп чәй эчүгә ни җитә! Балаларыгыз белән катлаулы булмаган печенье яки торт рецепты сайлагыз да бергәләп пешерегез. Ашаганда мактарга онытмагыз! Иренмәсәгез, бер атна эчендә балагыз ничә төрле «тәмлүшкә» пешерергә өйрәнергә мөмкин бит.

Мода күрсәтү

Балаларга шкафта тәртип урнаштырырга әйтеп торсагыз да, андагы пөхтәлек озакка сузылмаска мөмкин. Ә менә шкафны бушатып, андагы булган киемнәрдән мода күрсәтү оештырсагыз, балаларга бик ошаячак. Бердән, кайсы кием белән кайсы килешәчәген бала белеп торачак, икенчедән, артык киемнәрне алып куеп, кирәклеләрен генә калдыру сыгылып торган шкаф киштәләрен шактый бушатачак. Баланың мода күрсәтүдән алган илһамы  шкаф җыештыруга да җитәчәк.

Фәнни-популяр видеолар карау

Ә сезнең балаларыгыз белән заманча фәнни-популяр видеолар караганыгыз бармы? Кыска, аңлаешлы роликлар аша балаларга кызыклы мәгълүматларны сеңдерергә мөмкин бит. Ни өчен зебра буйлы-буйлы, компасны ничек алдарга, ни өчен йокларга кирәк дигән гап-гади сорауларга җавап табу бала файдасына булачак.

Гаилә белән кино карау

Коронавирус таралу сәбәпле, балалар белән кинотеатрларга барудан тыелып торсагыз яхшырак булыр. Нәкъ кинозалдагыча, попкорн алып, гаилә белән диванга тезелеп утырып, балалар   өчен кызыклы булган фильм яки мультфильм карагыз. Балалар бик канәгать булачак.

Көзге фотосессия ясау

Балалар белән көзге табигатьтә фотосессия ясау дигәндә, монда сүз аларны фотога төшерү турында гына бармый. Рольләрне алмашып, баладан фотограф ясау аның өчен тагын да күңеллерәк булачак. Әти-әнисен, җирдәге алтын яфракларны, янып торган кып-кызыл миләшләрне фотога төшереп, бала үзенә ләззәт алачак.

Өстәл уеннары уйнау

Әллә кайчан онытылган, җыеп куелган домино, шашка, шахмат, хоккей һәм футбол кебек  өстәл уеннары «чемпионаты» уздырырга мөмкин. Монда шулай ук бөтен гаиләгез белән катнашсагыз күңелле булачак.

Альбом ясау

Соңгы вакытта фотоларны телефонда саклыйбыз. Күпләребез соңгы тапкыр фото ясап, альбом тутырганын хәтерләми дә торгандыр, мөгаен. Шунлыктан каникул көннәрендә телефондагы уңышлы фотолардан, көзге фотосессиядән фотоларны ясатып, һәр баланың шәхси альбомын бергәләп тутырып куйсагыз да яхшы булыр.

Кыскасы, әлеге киңәшләр каникул көннәрен төрләндереп җибәрер. Ялларны авырмый гына, балаларыгыз белән күңелле итеп уздырырга язсын!

Чыганак: "Ватаным Татарстан"