САК БУЛЫГЫЗ, МОШЕННИКЛАР!: Россия Эчке эшләр министрлыгының Актаныш районы буенча бүлеге кисәтә

Социаль мошенниклык фактлары арту сәбәпле, шулай ук гражданнарның мөлкәтенә финанс зыян килүне булдырмау, кисәтүгә юнәлдерү максатыннан, республикада "Сак булыгыз, мошенниклар!"  акциясе үтә. Акция 29 марттан 5 апрельгә кадәр дәвам итә. Акция барышында полиция хезмәткәрләре тарафыннан райондашлар белән очрашулар үткәреләчәк, мошенниклар тозагына эләкмәү буенча аңлату эшләре алып барылачак.

Хөрмәтле райондашлар! Әлеге гади генә киңәшләрне хәтерегездән чыгармасагыз,  игътибар үзәгендә тотсагыз иде:
-нинди генэ сәбәпләр әйтсәләр дә, йортыгызга чит кешеләрне кертмәгез;
-үзләрен социаль хезмәткәрләр яки башка төр ярдәм күрсәтү оешмаларыннан дип таныштыручыларның документларын сорагыз, эшләгән урыннарына шалтыратып, алар әйткән мәгълүматны тикшерегез;
-сездә бозым бар, ярдәм итә алам диючеләргә ышанмагыз;
-чит кешегә банк картасы паролен, картаның икенче ягындагы өч санлы кодны бервакытта да әйтмәгез;
-туганың полициягэ эләккән, авариягә очраган дип, сезне куркытырдай башка төрле  хәбәр җиткерүчегә ышанмагыз, иң элек туганыгызның үзенә, аның белән сөйләшә алмаган очракта, полиция бүлегенә шалтыратыгыз. Гадәттә киресен эшлиләр – туганы өчен борчылган корбан башта мошенниклар кушкан сумманы тиз генә алар әйткән адреска күчереп куя, соңыннан гына полициягә шалтырата. Акча күчергәнче полициягә шалтыратып, сорауны ачыкларга кирәк;
-авыр хәлгә юлыккан туганыгызга ярдәм итәм дип, үзен юрист, адвокат, хокук саклау органы хезмәткәре дип таныштыручыга акча бирмэәгез, абонент номерларына, башка төрле исәплэргә акча күчермәгез;
-әгәр интернет аша товар сатып алырга уйлагансыз икән, банк картагыз белән бәйләнеше булмаган телефон номерыгызны әйтегез;
-билгесез абоненттан нинди дә булса интернет-ресурска күчү турында хәбәр килгәндә, теләсә нинди сылтама (ссылка)буенча күчмәгез – телефоныгызга вируслы программа керергә мөмкин. Телефон номерыгызга бәйле банк картагыздан барлык акчаларыгызны салдырырлар;
-банк картагыз төзексез хәлгә килгән – “заблокирована” дигән хәбәр алуга, картаның икенче ягында күрсәтелгән «кайнар линия» телефонына шалтыратыгыз. Кирәк булганда паспортыгыз белән банк офисына мөрәжәгать итегез.

Хөрмәтле райондашлар, сезне алдарга, алдау юлы белэн акчагызга ия булырга омтылганнарын белсәгез, әле акчагызны күчергәнче, «эш узганчы», полиция хезмәткәрләре, туганнарыгыз, ышанычлы кешеләрегез белән киңәшләшегез. Үзегезгә һәм  якыннарыгызга карата игътибарлы булыгыз!!! Әгәр инде шундый күңелсез очракка тарыгансыз икән, 02, 3-04-02 телефоннарына шалтыратып, район полиция бүлегенә хәбәр итүегез сорала. Шулай ук кәрәзле телефон аша 102 номеры буенча түләүсез шалтырату да мөмкин.