Үзәк китапханәдә «Минем гражданлык позициям» чарасы узды

Район үзәк китапханәсе сайлаулар турында укучыларга мәгълүмат бирү, хокукый белемнәр булдыру максатыннан «Минем гражданлык позициям» дип исемләнгән чара уздырды.

Китапханәче Фәндия Гайнанова Актанышның беренче санлы мәктәбе укучыларына сайлаулар турында сөйләде. Чараның максатын оештыручы яшь буында актив гражданлык позициясе булдыру, хокукый грамоталылыгын арттыруда күрә. Әлбәттә инде, китапханәгә килгәч укучыларга берочтан яңа китаплар тәкъдим иттеләр. Кызыклы басмалардан күргәзмә дә эшләп, күзәтү ясалды. Китаханә хезмәткәрләре китап уку, китапны яратуның кеше шәхесе өчен мөһимлеген аңлаттылар. 

Чарада "Бердәм Россия" партиясенең җирле бүлеге сәркатибе Зәһинә Исламова да катнашты. Зәһинә Гафурҗан кызы укучыларга сайлау буенча төп терминнарга белешмә бирде: 

Бу чара Парламент дәресләре дә булып тора. Сайлауларның төзелеше, аның ничек узуы, кандидатларны билгеләү ничек башкарыла, барысы турында да укучылар кызыксынып тыңлады. Үзләрен кызыксындырган сорауларга җаваплар бирдем. Сайлау компаниясенә катнашканчы, 18 яше тулганчы ук кешедә хокукый белемнәр булырга, сәяси карашлары алдан формалашырга тиеш. Әлеге чара тәрбияви яктан да әһәмиятле.

Парламент дәресе ахырында укучылар әдәбии викторинада катнашып, сорауларга җавап бирделәр.

Юлай Низаев фотолары.