Кулда тырма-себерке: Бүген районыбызда шимбә өмәсе

           Актаныш авыл башкарма комитеты тарафыннан оешмаларга участоклар бүлеп бирелгән иде, бүген дә әлеге мәйданнарны тырмалау,  чүп-чардан арындыру эшләре гөрли.

           Ленин паркы территориясен җыештыру  Актанышның беренче санлы мәктәбе укучыларына йөкләнгән. Парк биләмәсенең кай тарафына күз салсаң да, укучыларның шат тавышы ишетелә. Кулларына тырма-себерке тоткан балалар тырышып эшлиләр, саф һавада физик хезмәт бит очларын алландырган, кыз-малайларның кәефләре күтәренке.

           Безнең "Актаныш -информ" коллективы да район үзәген чистартудан читтә калмады, иртәннән үк мөхәррият бинасы тирә-юненә һәм "Рәхәт" кафесы янындагы бакчага коелган яфракларны тырмаладык.

          Капчыкларны тутырып юл буена тезүгә, коммуналь хуҗалык егетләре чүмечле тракторлар, йөк машиналары белән килеп төяп алып киттеләр. 

            Әле агачларда яфрак күп- димәк, өмәләр дә дәвам итәчәк.   Районыбызда беркем дә бу кирәкле гамәлдән читтә калмас, бөтен республикага "Татарстанның Швейцариясе" булып танылган Актанышны ямьләндерү, чистарту эшендә актив катнашыр дип уйлыйбыз.