Актаныш районының Киров һәм Зөбәер коллективлары- театр айлыгы җиңүчеләре
Бүген Актаныш районында кышкы сезон буена дәвам иткән театр айлыгына йомгак ясалды. Бүләкләү тантанасына кадәр тамашачылар Киров халык театры тарафыннан сәхнәләштерелгән «Тау артында тал елый» драмасын карады. Бөек Ватан сугышы чорындагы авыл, тыл тормышын чагылдырган бу әсәр елатты да, елмайтты да. Актаныш районы башкарма комитеты җитәкчесенең социаль мәсьәләләр буенча урынбасары Дилбәр Әнвәрова әйткәнчә, мондый дәһшәтле мизгелләрне безгә бары тик сәхнәдә генә күрергә язсын, тизрәк махсус хәрби операцияләр тәмамланып, якташларыбыз исән-сау туган ягыбызга әйләнеп кайтсын!
Мохтар Мутин исемендәге драма смотры быел Ватанны саклаучылар һәм Җиңүнең 80 еллыгына багышланды. Театр смотрында 47 театр коллективы катнашты, 260 тан артык үзешчән артист төрле образларны башкарды. Арада төрле һөнәр ияләре, өлкәннәр, балалар да бар. Гаиләләре белән үзешчән сәнгатьне яратып, районыбыз мәдәнияте үсешенә зур өлеш керткән райондашларыбыз булу тагы да сөенечле. Бүген аларның иң- иңнәре җитәкчеләр тарафыннан хөрмәтләнде.
Актаныш районы башкарма комитеты җитәкчесенең социаль мәсьәләләр буенча урынбасары Дилбәр Әнвәрова районыбыздагы театр коллективларының хезмәтенә олы бәя бирде, бу кадәр коллективларның дәрт-дәрман белән спектакльләр куюына республиканың төрле төбәкләрендә яшәүчеләр дә соклана. Әлеге традицияләрне киләчәктә дә дәвам итеп, алдагы елларда да халкыбызның театр сәнгатенә мәхәббәтен сакларга кирәк.
Урыннарга килгәндә,
- 1 урында- Киров һәм Зөбәер халык театр коллективлары;
- 2 урында- Иске Кормаш, Пучы, Иске Богады халык театр коллективлары;
- 3 урында- Иске Байсар, Иске Сәфәр халык театр коллективлары.
Әлеге коллективлар һәм аерым номинациягә лаек булучы актерлар мактау грамотасы һәм премия белән хөрмәтләнде.
Следите за самым важным и интересным в Telegram-каналеТатмедиа
Нет комментариев