Укучылар БДИга кертелү өчен беренче тапкыр йомгаклау иншасы яза

3 декабрьдә Татарстан мәктәпләрен тәмамлаучы 18 меңгә якын укучы Россиянең башка төбәкләрендәге яшьтәшләре белән бергә, 2015 елгы БДИ тапшыру мөмкинлеген алу өчен, йомгаклау иншасын язачак. Темалары экзаменга 15 минут кала гына билгеле була. Укучылар иншаны 235 минут язачак, ә сәламәтлекләре начар булган укучылар 1,5 сәгатькә озакрак. Укучыга кара гелевый ручка, паспорт, әгәр кирәк булса - дарулар һәм ашамлыклар экзаменга алып керергә була. Орфографик словарьлар комиссия тарафыннан биреләчәк. Инша нәтиҗәсе "зачет" яки "незачет" булачак. "Незачет" булган очракта иншаны 4 февраль һәм 6 майда яңадан язып булачак.