Актанышлылар үз киләчәкләренә битараф түгел

Бүген, 18 сентябрьдә, иртәнге сәгать 8дә Актаныш районында 47 сайлау участогы үз ишекләрен ачты, аларның 6сы - электрон. Көн дәвамында барлыгы 23 342 райондашыбыз үз киләчәкләре өчен тавыш бирер дип көтелә. Участокларда иртәнге сәгатьләрдән үк хокук сакчылары, МЧС хезмәткәрләре кизү тора.

Шунысын да әйтергә кирәк: Россия парламентына сайлаулар белән бер үк вакытта Актанышның дүрт авыл җирлегендә - Такталачык, Аккүз, Югары Яхшый, Иске Кормашта өстәмә сайлаулар үтә. Биредә яшәүче бер округ халкы Татарстан Республикасы муниципаль берәмлекләре вәкиллекле органнарына да депутатлар сайлый. Дәүләт Думасына депутатлар сайлау өчен ике бюллетень бирелсә: партия исемлеге һәм бермандатлы сайлау округы буенча, ә муниципаль сайлаулар да үтүче җирлекләрдә өченче бюллетень дә булачак.

Актанышта исә, башка сайлаулардан үзгә буларак, быел 57 бистә сайлаучылары сәләтле балалар өчен гуманитар гимназия бинасында урнашкан участокта тавыш бирәләр.