Актанышбашны Эйфель манаралы итүче

Актанышбаш авылында гомер итүче Шәйхенур Әхмәтов 10 апрель көнне үзенең 90 яшьлек гомер бәйрәмен каршы алды. Шәйхенур ага мөхәрриятебез белән тыгыз элемтәдә торучы, үзенең тарихка кагылышлы язмалары белән даими сөендерүче хәбәрчебез дә.

90 яшен түгәрәкләсә дә, Шәйхенур абыйның егәре әле ташып тора. Һич кенә дә тик торуны белми торган шәхес ул. Шуңадыр да, ул яшәгән йорт та авылда әллә кайдан аерылып тора. Чөнки бер генә капка төбендә дә Эйфель башнясын, аккошлы коены, бизәкләп эшләнгән җил тегермәнен күрмәссең! Боларны Шәйхенур абый үз куллары белән ясаган.

–Ни өчен нәкъ менә әлеге манараны ясарга булдыгыз, –дип кызыксынуыбызга, ул:

– Париждагы Эйфель башнясын татар кешесе ясаган дип укыдым да, мин дә ясап карарга булдым. Тик түбәсенә ай куеп эшләдем, –дип елмайды, һәрчак көр күңелле әңгәмәдәшебез.

Әнә шулай бар эшеннән канәгатьлек хисләре алырга өйрәнгән ул. Оста куллы булуы, мөгаен, әтисе Шәмсиәхмәттән  күчкәндер. Аны бик оста тегүче, итек басучы иде дип искә алды Шәйхенур абый. Үзе дә тормышның арбасына бик яшьли җигелә.

Бу хакта тулырак газетабызның алдагы санында укый аласыз.