“Әдәби герой музее” бәйгесенең җиңүчеләре билгеле

Районкүләм этапта җиңү яулаган Шәйдуллин Гадел, Галләмова Зәлия, Әхмәтова Ленараның (Аккүз) эшләре республикада икенче урынга лаек булдылар, алар республика балалар китапханәсенең һәм "В Контакте" төркемендә кул эшләренә күп тавыш бирү юлы белән тамашачы мәхәббәтен яулаган өчен диплом, истәлекле бүләк белән бүләкләнделәр. Алар һәм районкүләм уздырылган этапта икенче урын алган Сәлимова Сөмбел (Әнәк авылы), Муллагалиев Айназ (Чәчер авылы) Актаныш үзәк балалар китапханәсенең мактау кәгазьләренә һәм истәлек бүләкләренә лаек булдылар. Шулай ук, авыл җирлекләрендә әлеге бәйгене оештыруда зур көч куйган, балаларны әзерләгән Аккүз төп гомуми белем бирү мәктәбе укытучысы Шәйдуллина Ләйлә, авыл китапханәсе мөдире Галләмова Зөлфирә, Пучы урта мәктәбе укытучысы Муллагалиева Гөлназ Рәхмәт хаты белән бүләкләнәләр.

Бәйгене оештырган Актаныш үзәк балалар китапханәсе Республика балалар китапханәсенең Рәхмәт хаты белән бүләкләнде.