Көзге яңгыр, көзге салкын яңгыр, Болытлары шундый карадыр...

31 октябрь көнне Игелек үзәгенә репрессия корбаннарын искә алу көненә сәламәтлеге мөмкинлек биргән 15 кеше(районда барлыгы 38 кеше) килгән иде.

Алар иң элек Җиңү паркындагы репрессия корбаннары истәлегенә куелган таш-һәйкәлгә венок салдылар. Районда сәяси репрессиядән зыян күрүчеләр эшләре буенча комитет рәисе Ясүр Әхтәмов тантанага килүчеләрне исәнлекләре белән котлап, вафат булучыларны искә алып, тарихи авыр хәтирәләрне сак кына хәтердә яңартты. Сак кына. Чөнки кайгысын да, нахак сүзләрне дә, кимсетүләрне дә, ачлык-юклыкны да күп күргән - ата-аналарына хөрмәт күрсәтеп, балалары алдында җаваплылык тоеп кеше алдында сер бирми яшәгән әлеге төр категориягә кергән райондашларыбыз ул вакыйгаларны хәзер искә алганда да психик яктан күтәрә алмыйлар. Дулкынланалар, тетрәнәләр, әрнеп елыйлар...