Мопед йөртү таныклыгың бармы?

-Юлларда велосипед белән идарә итү - 14, мопед белән 16 яшьтән соң гына рөхсәт ителә.

-Велосипедчылар юлның уң як читеннән бер рәт булып кына хәрәкәт итә ала, әгәр җәяүлеләргә комачаулык тудырылмаса, юл кырыеннан да йөрергә ярый.

-Колонна булып барганда, унар велосипедчыдан торган төркемнәргә бүленеп һәм һәр төркем арасында 80-100 метр ара калдырып хәрәкәт итү сорала.

-Караңгыда велосипедта алгы фара һәм арткы фонарь кабызылган яки арткы якта яктылык кайтаргыч урнаштырылган булырга тиеш.

-Велосипедчы хәрәкәт юнәлешен үзгәрткәндә һәрвакыт кисәтү сигналы бирә. Сулга борылганда кисәтү сигналы итеп, сул кулын янга туры суза.

-Форма кигән полиция хезмәткәре велосипедчыны туктата ала. Теләсә нинди шартларда велосипедчы полиция хезмәткәре таләпләренә буйсынырга тиеш.

-Велосипед юлы дигән билге булганда, шул юлдан гына бару зарур.

Велосипедта йөргәндә нәрсә эшләргә ярамый:

-Велосипедта пассажир утыртып йөртү тыела.

-Тавыш сигналы, алгы фонаре, арткы фонаре һәм бер-берсеннән бәйсез эшли торган ике тормозы булмаган велосипедта йөрергә ярамый.

-Шоссе буйлап хәрәкәт иткәндә велосипедчыга рульне тотмый барырга ярамый.

2013 елның 5 ноябрендә "Юл хәрәкәте иминлеге турында"гы Федераль законның үзгәрешләре һәм өстәмәләре гамәлгә керде. Машина йөртү таныклыгындагы безнең өчен гадәти булган категорияләргә мопед һәм скутерлар өчен "М" категориясе дә өстәлде. Ата-аналар шуны онытмасын: хәзерлекле бала юлда килеп туган катлаулы ситуацияләрдән җиңелрәк чыга, юлда үзен ышанычлы тота. Ә уку - проблема түгел. Әлеге категория булмаган килеш скутер яки мопед белән идарә итүчегә РФ КоАПның 12.7 маддәсе 1 өлеше нигезендә, 5-15 мең сум административ штраф каралган; скутер, мопед исә махсус тукталышка куела.