Янып киткән учак җил белән таралып, башта якынча 5 гектарда коры үләнне чолгап ала, аннары исә шәхси секторда урнашкан сарайга үрмәли.
15 апрельдән Татарстанда янгын чыгу куркынычы арту чоры игълан ителде. Ягъни хәзер коры үлән, чүп яндыру аеруча куркыныч – мизгел эчендә тирә-якны ут чолгап алырга мөмкин.
Янгыннарның күпчелеге кеше саксызлыгы, ваемсызлыгы аркасында килеп чыкканы искә алсак, өмәләр гөрләгән вакытта мондый очраклар аеруча еш күзәтелә. Аеруча коры үләнгә ут төртү очраклары урман янгыннары китереп чыгара, авыл эчендә дә мондый хәлләр аяныч тәмамлана.
Ни кызганыч, республикада янгын чыгу куркынычы арту чоры кертелгән көнне үк Актаныш районында янгын теркәлеп, ул халыкка аеруча сак булырга кирәклеген төшендергәндер, шәт.
15 апрель көнне райондагы янгын сакчыллыгы бүлегенә 101 телефоны аша Чат авылының Үзәк урамында сарай януы хакында ашыгыч хәбәр килеп ирешә. Иң аянычы, янгын коры үлән, чүп-чар ягу нәтиҗәсендә килеп чыккан. Бакча артындагы коры-сарыга ут төртү нәтиҗәсе тагын да куркынычрак буласы булганын искәртә коткаручылар. Янып киткән учак җил белән таралып, башта якынча 5 гектарда коры үләнне чолгап ала, аннары исә шәхси секторда урнашкан сарайга үрмәли.
Халыкның уяулыгы, бигрәк тә авыл башлыгы Э.Ф. Насыйрованың янгынга каршы эшне оператив оештыра алуга ирешүе авыл йортларын янгыннан саклап кала. Урынга сабан таккан тракторлар чакыртылып, алар ялкын юлын өзә. Янгын сакчыллыгы хезмәткәрләре килгәндә, сарайда ачык яну күзәтелә, әмма инде аның таралу куркынычы булмый.
Яну объектына килгәндә, 1996 елгы агач корылма шифер белән түбәләнгән. Сарайга электр, газ үткәрелмәгән, бина иминиятләштерелмәгән.
Сүз уңаеннан, янгын чыгу куркынычы арту чорында әйткәнне аңламаучыларга карата штраф суммалары да саллы. Физик затлар өчен ул 2 меңнән 3 мең сумга кадәр дип каралган. Вазифалы затлар өчен штраф суммалары 6 - 15 мең сум, юридик затларга 150-200 мең сум күләмендә.
Шуңа күрә, мөхтәрәм райондашлар, бу чорда сак һәм игътибарлы булсагыз иде. Бер бөртек шырпыдан башланган янгын бик күп мал-мөлкәтне юкка чыгарырга сәләтле – шуны онытмагыз!
