Актаныш

Күңел могҗиза көтә

Яңа елга аяк басарга да санаулы гына көн калды. Яңа елны һәр кеше көтеп ала һәм үзенчә каршылый.

        Ә иске ел тарих битләренә уела. Быелгы ел нәрсәсе белән исегездә калачак? Яңа елны нинди өмет-хыяллар белән каршы аласыз? Кыш бабайга ышанасызмы дигән сораулар белән берничә райондашыбызга мөрәҗәгать иттек. 
           Нәсим Заһртдинов,  район башкарма комитеты җитәкчесенең мобилизация буенча ярдәмчесе:
– Чыннан да, моңынчы Яңа елларны ниндидер сихри могҗизалар, зур ышаныч, якты өметләр белән каршы ала идек. Хәзер никтер... әллә гомер сукмагын узган саен, олыгаю галәмәтеме, әллә тормышның яме киттеме, Яңа ел бәйрәмнәренә бер дә күңел үсми әле. Әллә инде якты өметләр баглаган Яңа елы да аның үз ышанычын акламый, елдан-ел авырлаша кебек. Каһәр суккан замана чире дә гөрләп яшәп яткан якыннарыбызны якты дөньядан алып китте. Күпмеләре әлеге авыруны кичергән, әле һаман да ныклап аякка басып китә алмый. Аптыраган, тагын ниләр күрсәтер киләсе Яңа ел!
Ә шулай да төшенкелеккә бирелмик, булганына шөкер итеп, бары тик яхшылыкка гына юрыйк!
               Иске елның борчу-хәсрәтләре, күңелсез мәшәкатьләре, көттереп яуган ап-ак кар астында калсын иде, Иншааллах! Һәммәбезгә дә сау-сәламәт булып, Яңа елларда да якыннарыбыз белән бергә-бергә матур гомерләр кичерсәк иде.
                  Ә инде Кыш бабабызның барлыгына ничек ышанмыйсың инде. Күршемдә генә өч оныгым яши бит. Кыш бабайдан бүләкләр сораган хатларны да, хәтта яза белмәгән бәләкәче өчен дә бергәләп яздык ( чыршы астына бүләкләр дә әзер). Һәр елдагыча, Яңа ел таңында үзләренең чыршы төбендәге бүләкләрне ачып куангач, дәү әти белән дәү әнинең чыршы төбе кызыксындыра аларны. Әти-әниләрен төрткәләп уятып, килеп тә җитәләр. Тормышның бөтен кызыгы, куанычы шулар белән инде. Узган көннәрдә яуган җепшек кардан оныкларым белән бергәләп, ишек алдына  Кар бабай ясап куйдык (әтиләрен үстергәндә үземнең аңа Кар бабай ясап биргәнемне генә хәтерләмим). Шулай инде, җырдагыча, баламның баласы, балдан татлы. 
         Яңа еллар белән, райондашлар. 

 

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: