Путин пособиесен ничек алырга? ИНСТРУКЦИЯ

Covid-19 вазгыяте буенча киңәшмә вакытында Россия Президенты өч яшьтән алып 16 яшькә кадәр һәр балага 10 мең сум акча түләнәчәген хәбәр итте. Яңа сервистан тыш, ярдәм алу өчен гаризаны Россия Пенсия фонды бүлеге аша да бирергә мөмкин. Моның өчен бары тик баланың туу турында таныклыгы һәм акчаларны күчерү өчен банктагы счет номеры гына кирәк булачак.

Бу хезмәтне ничек алырга?

Хезмәтне Россия Федерациясе Пенсия фонды тәкъдим итә. Гаризаны биш минутта тутырырга була.

Гаризаны әти яки әни, уллыкка-кызлыкка алучыларның берсе тутыра ала. Гариза язу өчен бала (бер яки берничә бала турында) һәм банк счеты турында белешмә кирәк. Бөтен юлларны да тутыру өчен аларны алдан ук әзерләп куярга кирәк.

Сезгә кирәк булачак:

• Һәр баланың да туу турында таныклыгы. Документны яки андагы белешмәләрне әзерләп куегыз. Әгәр баланың РФ ЗАГС органнары тарафыннан бирелгән туу турында таныклыгы юк икән, Пенсия фонды бүлекчәсенә яки МФЦга шәхсән мөрәҗәгать итәргә кирәк.
• Банк счеты реквизитлары. Аларны интернет-банкта карарга мөмкин. Шәхси счетның 20 урынлы саны, БИК һәм корреспондент счеты кирәк.
• Игътибар! Карта өслегенә язылган номер счет номеры белән тәңгәл түгел һәм түләүне күчерү өчен туры килми. Гаризада банк счетының 20 билгедән торган номерын күрсәтергә кирәк.
• Гаризада үзегез һәм балаларыгыз турында мәгълүмат тутырасыз. Барлык бала өчен дә бер генә гариза бирелә. Бернинди дә документлар күрсәтергә кирәкми: барысы да автомат рәвештә тикшерелә.

Биш гади адым

Беренче булып шәхси мәгълүматларны тутырырга кирәк.

Икенче — шәхесне раслый торган документ белән гариза тутыру.

Өченче — яшәү урынын күрсәтергә кирәк.

Дүртенче — балалар турында белешмә.

Бишенче — акчаны күчерү өчен реквизитлар.

Ахырда «Бирелгән мәгълүматларның дөреслеге өчен җаваплылык турында кисәтү» дигән урында тамга куярга кирәк.

Акчаны алу

Гариза язганнан соң ул автомат рәвештә ведомствога җибәрелә. Пенсия фондының территориаль органы биш көн эчендә түләү турында карар кабул итә. Карар турында хәбәр гариза бирүченең Дәүләт хезмәтләре порталында шәхси кабинетына килә.

«Гаризалар күп булу сәбәпле, эшкәртү вакыты озайтылырга мөмкин», — диелә дәүләт хезмәтләре сайтында.

Бер тапкыр бирелә торган түләүләрне бирү 1 июньнән башланачак. Акча гаризада күрсәтелгән банк счетына күчереләчәк.

Сервис вакытлыча эшләми

Кызганыч, күпчелек россиялеләр өчен сервис вакытлыча эшләми. Гариза язучылар сайт эшчәнлегендә авырлыклар һәм «500» яки «502» хатасы белән очрашты. Бу серверда көчле йөкләнеш булуын аңлата.

«Гаиләләрнең акча өчен мөрәҗәгать итәргә әле 5 ай вакыты бар, гаризалар 1 октябрьгә кадәр кабул ителә», — диде Россия Пенсия фондының Татарстан Бүлеге башлыгы Эдуард Вафин һәм барлык реквизитларны дөрес күрсәтергә өндәде. 

Intertat