Актаныш

9 февраль - волейбол көне: Танылган тренер һәм волейболчы- Ренат Газетдинов белән әңгәмә

Волейбол-җитезлек, чыныгуны таләп итә. Бу уен төрен һөнәри шөгыльләнүчеләр дә, һәвәскәрләр дә бик үз итә.

Саулык-чиксез зиннәтле байлык икәнен һәркем белә, аңлый. Волейбол уены көне уңаеннан муниципаль Актаныш спорт мәктәбе мөдиренең спорт эшләре юнәлеше буенча урынбасары, тәҗрибәле тренер Ренат Салават улы Газетдинов белән әңгәмә кордык.

- Хәерле сәгатьтә, Ренат! Волейбол спорты нәрсәсе белән үзенчәлекле һәм кызыклы? Сезнең шәхсән спорттагы төп юнәлешләрнең берсе бит инде аңлавымча?

- Беренче  чиратта, спортсменнарны тәбриклим. Волейбол спортының үсеше, ныклы тотрыклылыгы һәм лаеклы урыны илебездә, республикабызда, газиз җиребез-Актанышыбызда да бар. Бу спорт белән мавыгып олы яшьтәгеләр дә, балалар да матур гына уңышларга ирешәләр, 8 мәртәбә чемпион булган якташлар- Актаныш волейболчылары хаклы горурлыгыбыз!

 Үзем исә 2000 елдан волейбол белән ныграк дуслаша башладым. Миннән алда электән үк Рушат Рәзиф улы Гыйльлмуллин, Фирдәвес Гаяз улы Әхмәтовлар ныклы арена булдырганнар моңа. Алар башлаган эшне җаваплылык белән дәвам итәбез. 

- Волейбол уены спорты Актаныш җирлегебездә киң таралганмы, яшьләр шөгыльләнәме? Командаларның нинди казанышлары  бар?

- Әйе, волейбол серләрен һәм кагыйдәләрен күпләр өйрәнә . Үземнең  Татарстан Республикасы Спорт министрлыгы, Спорт Федерациясенең Мактау, Почёт грамоталарына, "Ел спортсмены" шәрәфле исеменә лаек булганым бар. Хезмәттәшләремә, рухи көч ташкыны бүләк итүче тәрбияләнүчеләремә рәхмәтем олуг. Тренерлар районда барысы да бик оста, яшьрәкләре өлкән буыннан тәҗрибә туплый, үрнәк ала.

 Җыелма командалар бар.

 Волейболда иң төп канун - бергә-бердәм булу. Көндәш команданың җиңүенә юл бирмәү. Татар Суыксуы, Әлемнәр-бик көчле ярышларда! Афәрин аларга! 

- Гомумән спортка яшьләр киләме? Спорт сезнең өчен тормыш сулышымы яки эш көннәре агышымы?
-Спортка яшь буын тартыла, Аллага шөкер. Чөнки район хакимиятебез, яшьләр эшләре, спорт һәм туризм бүлеге тарафыннан барлык уңайлы шартлар тудырыла. Махсус, соңгы стандартлы, яңа тренажёрлар, душ- бер дә шәһәрнекеннән ким түгел! Заллар якты һәм җылы. 

Әлбәттә, тормышымның агымы һәм сулышы ул. Спорт-сәламәтлек асылы, шәп кәеф рухлыгы чыганагы.

- Ниндирәк киңәшләр бирер идегез, волейболчыларга?

-Үгет-нәсихәт итеп әйтер идем шуны-күнекмәләргә  ешрак йөрегез

, сәламәт яшәү рәвеше алып барыгыз. Тренер булсагыз-һәр спортчыга игътибарлы булыгыз. Мәсәлән, 10-15 бала килде икән сезгә өйрәнү максаты белән-һәрберсенә шәхси мөмкинлекләренә карап биремнәр бирегез. Күнегүләр бик кирәк. 

-Ничә яшьтән  баланы волейбол секциясенә бирү яхшы?
-Болай  стандартлар кысаларында 7-8 яшьтән алып. Тизлек һәм көч барыбер дә сабыйларда иртәрәк формалаша башлый. Һәр кешенең, ата-аналарның үз ихтыярындадыр димен. Ә без, Актаныш тренерлары һәрчак талантларны ачуга әзербез! Ярышлар, спартакиадалар даими үтә, спорт күтәренкелеге сизелә.

Ренат Салават улы, җанлы һәм файдалы җавапларыгыз өчен рәхмәтләр яусын. Һөнәри бәйрәмегез котлы, спорт карьерагыз гомерлек булсын. 

Әңгәмәдәш - Юлай Низаев. 

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: