Спорт сөюче егет

Сүзем мәктәбебезнең 11 нче сыйныф укучысы Илһам Закиров турында. Егет кечкенә яшьтән үк спортка мөкиббән, спорт - аның өчен яшәү мәгънәсе. Илһам 5 нче сыйныфтан бирле җиңел атлетика белән шөгыльләнә. Остазлары Азат Хөсәенов һәм Рузил Тимеров Илһамны төрледән-төрле ярышларга, физкультура олимпиадаларына әзерлиләр.

Без компьютер заманында яшибез. Кайбер ата-аналар балаларының мәктәптән тыш вакытын ничек уздыруы белән бөтенләй кызыксынмый. Компьютер каршында күпме утырса утырсын, тик тавышы гына чыкмасын, аны гына борчымасын, дип уйлыйлар. Ә менә Илһам һәр көнне Аеш авылыннан күнекмәләргә килеп, тиешле нормативны үтәп кайтып китә. Үҗәтлеге, тырышлыгы нәтиҗәсендә һәм, әлбәттә, остазлары ярдәмендә ул район, республика, Россия турнирларында катнашып уңышлы чыгыш ясый, алдынгы үрләр яулый. Физкультура олимпиадасының муниципаль турында җиңеп, республика олимпиадасында ике ел рәттән призер, 2014 елда - җиңүче, регионара җиңел атлетика ярышында 2 нче урын, "Көзге кросс", "Кыш Бабай призына чаңгы ярышы"нда, Бөтенрәсәй йөгерү ярышы һ.б. бик күп ярышларда җиңүче егет үзе белән даими шөгыльләнгән, яңадан-яңа җиңүләргә рухландырган остазларына бик рәхмәтле. Илһам, районыбыз данын яклап, республика, төбәк ярышларында да уңышлы чыгыш ясый, зур җиңүләргә ирешә.

Билгеле булганча, баланың һәрьяклап нормаль үсешен өч яктан башка - укучы, укытучы һәм ата-ана, яки әби-бабай, гаилә әгъзалары тырышлыгыннан башка тулысынча гамәлгә ашырып булмый. Бу өч якның да бердәм булып эшләве шундый зур җиңүләргә китерә торгандыр. Мәктәбебез коллективы егетнең алда торган имтиханнарны тапшырып, үзе теләгән югары уку йортына кереп, максатларына ирешеп, яңадан-яңа үрләр яулап яшәвен тели.