Актанышлыларны сусыз гына суытып булырга охшап тормый! (+ФОТОЛАР)

"Сез киләсе булгангадыр инде, бүген иртәннән үк су бирделәр әле", - дип сөенечен җиткерде безне өенә үк дәшкән бер апа. (Ни ела, ни көл! Су безгә генә карап акса, көн дә урап китәр идек лә без! ) Ә өй кечкенә генә су саклау базасын хәтерләтте кебек: юыну бүлмәсе эреле-ваклы савытлар белән тулган. Савытларда - саргылт су. Әлеге урамдагыларның барысы да үзләрен мондый су саклау урыннары белән тәэмин иткән булып чыкты, кемдер - мунчада, кемдер өйдә су запасын саклый. Башка юл юк чөнки.

Восточная урамында сүтелә башлаган су йомгагының очы "Теплосервис" оешмасына таба тәгәрәде. Без уйлаганча ук, оешма җитәкчесе Дилфат Нәгыймов актанышлыларны борчыган сусызлык проблемасы эчендә шактый тирән "йөзә" булып чыкты. Актаныш районында 2003 елдан бирле халыкка 3 тармак буенча хезмәт күрсәтүче әлеге оешмада су мәсьәләсе чыннан да бик кискен тора.

"Бүгенге көндә 57 бистәне, сельхозтехника зонасын су белән тәэмин итү өчен 5 скважина тулы куәттә эшли. Әмма су кулланучыларның артып торуы нәтиҗәсендә бу территорияне су белән 100% тәэмин итәргә аларның көче җитеп бетми. Суны арттыру юнәлешендә аэропорт зонасы перспективалы булып санала. Бүген биредә 8 скважина бар, аларның дүртесе эшләп утыра. Икесе 57 бистә, сельхозтехника зонасына су бирсә, икесе - Әлемгә. Тагын икесенең суы аз дип, алар туктатып торылды. Промзонага дип шулай ук ике скважина борауланган, алар инде тоташтырылган да. Шушы участоктан 57 бистәгә дә трасса сузылган, егәрлек җитмәү сәбәпле, трассаларда әлегә су юк. Бик тиздән биредә трансформатор алыштырылып, өстәмә су запасы булачак", - дип, Дилфат Мисхәт улы булган проблемаларга ачыклык кертте.

Бүгенгә югарыда әйтелгән бистәләрдәге су мәсьәләсе менә шулайрак тора. Әкият илендә яшәмибез, җәмәгать , чынбарлыкта чуртан кушуы буенча тиз генә эшләнә торган могҗизалар, кызганычка каршы, юк һәм була да алмый. Шулай булгач, өметләнергә һәм көтәргә генә кала. Аңлашылганча, су мәсьәләсенең уңай якка хәл ителүе бары тик вакыт эше генә.

Су запасларын яңарта-яңарта тагын бераз көтеп карыйк әле. Көтеп тә нәтиҗәсе булмаса, алга таба күз күрер. Ачның ачуы яман булган кебек, кызган халыкны барыбер сусыз гына суытып булырга охшап тормый!

PS: Язманы автор һәм редакция рөхсәтеннән башка сайтларга һәм башка басмаларга күчереп алу тыела.