Актаныш

Актаныш районы

16+
2024 - Гаилә елы
Тема дня "Газета"

Эт елы килүен этләр сизәме?

Искиткеч матур бу эт Харли кушаматлы. Хуҗасы Равил Хаҗиев аны интернет аша эзләп, узган ел Түбән Камадан алып кайткан. Харлига бер яшь гыйнварда тула, әмма, күрәсезме, нинди мәһабәт гәүдәле?! Төньяк киңлекләрендә чанага җигеп, кешеләрне ташый торган Себер хаские токымлы ул. - Телевизордан узган ел биатлон буенча Олимпия чемпионы Дарья Домрачеваны...

Искиткеч матур бу эт Харли кушаматлы. Хуҗасы Равил Хаҗиев аны интернет аша эзләп, узган ел Түбән Камадан алып кайткан. Харлига бер яшь гыйнварда тула, әмма, күрәсезме, нинди мәһабәт гәүдәле?! Төньяк киңлекләрендә чанага җигеп, кешеләрне ташый торган Себер хаские токымлы ул.
- Телевизордан узган ел биатлон буенча Олимпия чемпионы Дарья Домрачеваны шушындый хаски чаңгыда тартып йөргәнен күрдем дә, үземнең дә сынап карыйсым килде. Тукта, алып карыйм әле, дидем. Җәй көне велосипед алдыннан чабып йөри Харли, кышын менә аның белән чаңгыга бастык. Чынлап та, бик кызык, күңелле, - дип сөйли Равил. Шулай инде, чаңгыда шуу буенча республика чемпионы булган егеткә үзен төрле яклап сынау теләге табигый. Интернеттан бу эт турында эзләнеп, аның турында төрле мәгълүмат җыеп, хуҗаларының язган хикәятләрен укып, фотосурәтләрен карап утырганда, кызыгып, хәтта үземдә дә аны булдырасым килеп китте. Бигрәк тә, зәңгәр, соры, яки, гомумән, икесе ике төстәге күзләре әсир итә... Матурлыгы өчен генә ала торган эт түгел шул! Авыр эш өчен яратылган, шуңа көндәлек шөгыльләнү, даими тренировкалар таләп итә торган үзенчәлекле токым икән ул Себер хаские. Аңарда бүре һәм себер этләре каны ага. Шуңа карамастан, искиткеч дустанә, бар кешегә ачык, хәтта хуҗасын рәнҗетүченең дә барып битен яларга мөмкин - усаллык, кемне я нәрсәне дә булса яклау һәм саклау аңа, гомумән, хас түгел. Акыллылар. Урам этләре кебек рәхәтләнеп өрми дә алар, ара-тирә тавыш кына бирәләр. Бик тә ирек ярата, бәйгә куялар икән, әкренләп акылдан шашарга мөмкин.
- Вольерда ялгыш кына муенчагы я бавы онытылып кала икән, бетте, аны икенче әйләнеп килүеңә урталай өзеп ташлаган була инде, - дип көлә Равил. Бәйләми торыгыз әле, миңа ирек кирәк, диюе.
Себер хаские токымын эскимослар китереп чыгарган. Гаиләдә бала тугач, котып салкынында катып үлмәсен өчен, эскимос әти-әни аны җылыту өчен өйгә хаски көтүен кертә торган булган. Шул рәвешле, бу этләр канына балаларга карата аеруча җылылык, ярату сеңгән.
- Апайлар бик ярата Харлины, кунакка кайткач, яныннан китмиләр дә, - ди Равил дә.
- Әмма усаллыгы булмаса да, шаярганда ялгыш тырнап алырга, киемне ертырга мөмкин. Шуңа тырнакларын гел кисеп торам. Өстәвенә, бер яшькә кадәр алар гиперактив, хәтта 1-2 минут тик утырсын өчен дә, әйтик, аның белән фотога төшкәнче генә дә, алдан озаклап йөртеп алҗатырга кирәк. "Утыр!" "Ят!" "Тик тор!" командаларын өйрәнәбез, вакыт кына җитсен!
Ноябрь аенда Казанда "Алга, Акбай!" дип аталган җигүле этләр бәйгесендә Равил дә үзенең Харлие белән байкджоринг төрендә (эт белән велосипедта узышу) катнашырга ниятли, әмма спортчы егеткә башка ярышка китәргә туры килә. Киләчәктә әле ярышлары да, уңышлары да булыр! Хәзергә исә гаиләләрен бик яраткан Харли белән Яңа елны каршыларга әзерләнә Хаҗиевләр. "Харли Яңа елны беләмени ул?" - димәгез, үз елы - Эт елы бит бусагада! Һәм бары тик этләрнең төп сыйфаты - эшенә һәм хуҗасына тугрылык, яклау-саклау, мәрхәмәтлелек белән истә калсын иде ул.
Реклама

Следите за самым важным и интересным в Telegram-каналеТатмедиа

Реклама

Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев