Үзебезнең җирдә - үзебезнең җиңү (ФОТОМИЗГЕЛЛӘР ДӘ БАР)

Моннан биш ел элек Республиканың ул вакыттагы мәгариф һәм фән министры Энгель Нәвап улына Минзәлә авыл хуҗалыгы техникумы Татарстанның урта һөнәри белем бирү уку йортлары студентлары арасында көрәш турниры үткәрүне сорап мөрәҗәгать итә. Татарстаныбызда келәм батырларының яңа буыны ныгып килгән чорда министрлык әлеге тәкъдимне ике куллап күтәреп ала. Нәтиҗәдә, көрәш турниры спартакиада кысаларына да кертелә.

Аның беренчесе, билгеле, Минзәлә шәһәрендә үтә. Баштагы елларда шәһәр һәм район студентлары арасында оештырылган турнирның тора-бара үз калыплары барлыкка килә, шул рәвешле Татарстанда авыл районнары урта һөнәри белем бирү уку йортлары студентлары өчен махсус турнир оеша.

Алдагы елларда Минзәлә, Казан, Мамадышта үткәрелеп, студентлар өчен шактый дәрәҗәлегә әверелгән бәйгенең бишенче юбилей турниры быел Энгель Фәттаховның туган җире - Актанышта гөрләде.

28 командага исәпләнгән бәйгенең Актаныштагысы үз келәмендә 100дән артык көрәшчене кабул итте. Республиканың 18 урта һөнәри белем бирү уку йорты 7-8 апрель көннәрендә"батыр" исеме өчен бил алышты биредә.

Шунысы игътибарга лаек, Татарстанның визит карточкасына әверелгән көрәш бәйгесе урта һөнәри белем бирү йортларында да, еллар буе сынап, үз батырларын булдырган. Быелгы турнирда да Арча, Саба, Актаныш, Кукмара, Мамадыш, Минзәлә районнары студентлары, бил ныгытып, беләк көче белән яулаган позицияләрен бирергә теләмәде. Көрәш турнирының икенче көне аеруча тере, көчле, дулкынландыргыч булды. Ул көнгә келәмдә чын батырлар гына калган иде дисәк тә, һич арттыру булмас, мөгаен. "Актаныш" спорт комплексы җанатарларның тавышыннан, көрәшчеләрнең көчле бил алышуыннан дер селкенеп торды. Кайберәүләргә бөтенләй буйсынмаган җиңү тәмен күз яшьләре аша татыган келәм батырлары да булды бу турнирда.

15 яшьтән 21 яшькә кадәрге студентларны җәлеп иткән бәйгедә 6 үлчәү авырлыгында җиңүчеләр билгеләнде. Татарстанның 18 егете "Келәм батыры" дигән мактаулы исемгә лаек булды. Шунысы куанычлы, алар арасында берничә ел буе әлеге исемгә ия булучылар бар. Афәрин, егетләр! Афәрин, Республиканың ныклы киләчәге!

Актанышта үткән быелгы көрәш турниры район тарихына икеләтә истәлекле булып кереп калачак: Респубкакакүләм турнирның беренче юбилее буларак һәм иң мөһиме, Актаныш технология техникумы командасының әлеге турнирда хаклы рәвештә җиңү яулап, батыр калуы белән. Актаныш егетләренә җиңү җиңел бирелмәде, нәкъ менә шуңа да алар өчен бик кадерле, бик көткән җиңү иде ул. Иң мөһиме: үз җиребездә - үзебезнең җиңү.

Көрәшнең баш хөкемдары, Минзәлә шәһәреннән Р.Р. Бәдриев быелгы көрәшнең югары дәрәҗәдә оештырылуын ассызыклап үтте. "Безгә ике келәм дә җитә иде, актанышлылар исә көрәшчеләрне дүрт келәм белән каршы алды. Егетләргә көрәшкә җылынып, әзерләнеп керү өчен бик яхшы җирлек булды ул. Ике көн дәвамында авыр травмалар, имгәнүләр булмау да моңа дәлил", - дип искәртте баш хөкемдар.

Командалар арасында исә дүртенче, бишенче, алтынчы урыннарга Кукмара, Арча, Минзәлә районныры чыкты. Өченче урында - Саба аграр көллияте, икенче урында - Мамадыш полетехник техникумы.