Актаныш

Татар-башкорт дуслыгын дәвам итеп...

Бүген районыбызда күрше Башкортстан республикасы Туймазы районының актив ветераннары кунакта булдылар. Аларны аскы Актаныштагы ветераннар йортында район башлыгы урынбасары Рәйхан Галимҗанова, районның ветераннар оешмасы җитәкчесе Нурулла Нурлыев һәм актив ветераннар каршы алды.

 

Ике арадагы дуслык хисе инде шактый еллар дәвам итә. Безнең район делегациясе район ветераннар оешмасы җитәкчесе Нурулла Нурлыев белән берлектә Туймазы шәһәрендә булып, үзләренең эчтәлекле концерт программасын да күрсәтеп кайтканнар иде. Анда алган тәэсирләре әле дә күңелләрендә саклануын яшерми алар. Узган ел да Туймазы ветераннары районыбызда булып, истәлекле урыннар белән танышып, өлкәннәребез белән аралашып киткәннәр иде. Быел инде Туймазы районы һәм шәһәре ветераннар советы рәисе Адонис Фазуллин үзе белән башка ветераннарны алып килгән. Чөнки аларның да Актанышны күрәселәре килүен бәян итте ул.

Безнең ветераннарыбыз аларны якты йөз, татар халкының милли ризыгы булган чәк-чәк белән каршы алдылар. Аскы Актанышның ветераннар йортында “Гәрәбә” клубына йөрүче өлкәннәр кунаклар өчен моңнарын кызганмады. Күңелләргә үтеп керерлек итеп җырлады, өздереп биеде.

Район башлыгы урынбасары Рәйхан Галимҗанова кунакларны үзебезнең җирлектә күрүгә шат булуын яшермәде.

– Безнең Актаныш районында 30 меңгә якын кеше яши. Шуларның 9700ен ветераннар тәшкил итә. Алар актив тормыш белән яши. Районыбызның шушындый гүзәл дәрәҗәгә җитүендә аларның үз чорларында куйган хезмәтләре ята. Бүген дә алар бер чаралдан да читтә калмыйлар. Яңа идеяләр, фикерләр белән янып яшиләр. Аларның киңәшләре безгә һәрвакыт ярдәм итә. Сезнең белән шушылай аралашу да бик матур күренеш дияр идем. Киләчәктә дә дуслык җепләре дәвам итәр дип ышанам. – диде.

– Татарстан, Башкортстан ике тугандаш халык. Актаныш - Татарстанның чигендә урнашканлыктан, Башкортстаннан килгән кунакларны кабул итүче район да булып тора. Без кунакларга шат. Чөнки ике тугандаш халык бергә яши икән, аннан берәү дә оттырмый, киресенчә ота гына дияр идем. Сездәге матур башлангыч, Ык буе сабантуйлары бездә дә дәвам итте. Без сезгә һәрвакыт шат. Сезне үзебезнекеләр итеп кабул итәбез, -дип Нурулла Нурлыев кунакларга истәлек бүләге тапшырды.

– Актаныш-Туймазы арасындагы 150 чакрымны 15 чакрым итеп кенә сизәбез инде. Дуслык җепләребез көннән-көн ныгый бара, шуңа сөенәбез. Без Татарстанны яратабыз. Сезгә матурлыклар күрергә киләбез. Килгән саен сез аны арттырып торасыз. Шушылай матур итеп яшәргә кирәклекне башкаларга да күрсәтергә кирәк. Бездә Фәнил Гыйльметдин улы Галимов дигән бик уңган егет бар. Ул Рәсәйдәге татар авыллары эшмәкәрләренең ассоциациясен җитәкли. Ул да сезгә сәламәнәрен җибәрде, -диде Адонис Фазуллин.

Һәм Нурулла Нурлыева аның Рәхмәт хатын, кулдан эшләнгән сәгать бүләк итте.

Ул шулай ук яшьләрдә зурларга ихтирам тәрбияләү, туган илгә, туган районга, туган төбәккә карата мәхәббәт тәрбияләү төп максатларының берсе икәнлеген дә бәян итте. Шул уңайдан мәктәпләрдә балалар белән патриотик темага очрашулар алып баралар.

–Тугандаш республиканың ветераннар советлары белән тыгыз бәйләнештә эшләп киләбез. Озак еллар Әлмәт, Азнакай, Баулы, Ютазы, Лениногорск районнары белән элемтәдә торабыз. Нигездә, башлангыч ветераннар оешмасы җитәкчеләре белән йөрибез. Үзебезгә бик күп файдалы әйберләр алабыз. Аларны эшчәнлегебездә кулланабыз. Социаль туризм буенча Уральскийга, Волгоградка бардык, Татартсанның бик күп шәһәрләрендә булдык, –ди ул.

Безнең районда исә кунакларга күрсәтердәй истәлекле урыннар бик күп. Кунаклар көн дәвамында алар белән танышып йөрделәр. Аеруча быел гына ачылган Әнәктәге “Бабайда кунакта” паркына соклануларын яшермәделәр.

undefined

undefined

undefined

undefined

Реклама

undefined

 

undefined

undefined

undefined

 

undefined

undefined

undefined

undefined

undefined

undefined

undefined

undefined

undefined

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Комментарии (0)
Осталось символов: