Татарстанлыларга чит илләрдән штрафсыз ничек кайтырга икәнлеген аңлаттылар

Казан халыкара очышлар өчен ачык, әмма чит илләрдән килүчеләргә Covid-19 ның таралмавын тәэмин итәр өчен дәүләт хезмәтләре порталында теркәү узарга кирәк. Бу хакта «Татар-информ» мәгълүмат агентлыгында узган матбугат конференциясендә “Роспотребнадзор”ның ТР буенча идарәсе җитәкчесе урынбасары Любовь Авдонина сөйләде.

“Бүгенге көндә чит илдән кайткан пассажирлар 3 календар көн эчендә тест узарга һәм аны Дәүләт порталына кертергә тиешлеге турында күрсәтмәләр җибәрелә”, – диде спикер.

Россия территориясенә кайтучылар башта Бердәм дәүләт һәм муниципаль хезмәт порталында “Россия Федерациясенә кайтучыларны теркәү” бүлегендә электрон анкета тутырырга кирәк. Моны очышка кадәр, билет алган вакытта, тик рейска теркәлер алдыннан эшләргә кирәк.

Илгә килгәннән соң, өч көн эчендә элеккеге турист ПЦР методы белән Covid-19га лаборатор тикшерү узарга тиеш. Нәтиҗәләрне дәүләт хезмәтләре порталында «Россия Федерациясе территориясенә килүче яңа коронавирус йогышына тест нәтиҗәләре турында мәгълүмат бирү» формасын тутырганнан соң урнаштырырга.

Әгәр Татарстанга килгән кешенең сәламәтлеге 14 көн эчендә начарлана икән, ул килү урыны буенча медицина ярдәме сорап кичекмәстән мөрәҗәгать итәргә тиеш, клиникага барырга кирәкми, табиб өйгә килә, медицина хезмәткәренә чит илдә булу даталары һәм урыны турында хәбәр итәргә кирәк.

Коронавирус инфекциясенә тест уңай нәтиҗә биргән очракта, ТР буенча “Роспотребнадзор” күрсәтмәләрен үтәргә кирәк: яшәү урыны буенча ике атна дәвамында изоляция үтәргә һәм гаилә һәм башка кешеләр белән элемтәләрне туктатып торырга.