Даруга акча жәл

Россия халкы ашау-эчү һәм күңел ачуга акча кызганмый башлаган. Белгечләр моның төп сәбәбен халыкның ил икътисадындагы үзгәрешләр белән азрак кызыксынуында күрә. Initiative үзәге уздырган сораш­тыруда респондент­ларның 28 проценты гына Россия икътисадындагы вәз­гыять белән кызыксынып торуын әйткән. Чагыштыру өчен: 2015 елның декабрендә андый фикердә торучылар саны 40 процент тәшкил иткән булган.

Ул чакта ил халкының яртысы диярлек ашау (49 процент), күңел ачу (47 процент) һәм спиртлы эчемлек­ләргә (47 процент) акчаны азрак тота башлавын әйт­кән. Бүген исә әлеге төр товарларга акча жәлләүче­ләр саны 3-4 процентка киме­гән. Шулай да сәламәтлек дигәндә, ил халкы элеккечә үк акчаны кысып тотуын белә. Тик­шеренү нәтиҗәлә­реннән кү­ренгәнчә, бер ел эчендә Россиядә табиб киңәш ит­кән даруларның арзанрак аналогын сатып алучылар саны ике процентка арткан (34 процент).

"Россия халкы кризиска ияләнеп бетте диярлек. Шуңа күрә хәзер аларның чыгымнары да кризиска кадәр булган дәрәҗәгә кире кайта", - ди үзәк башлыгы Анна Мазурина.

Маркетологлар гильдиясе советы вәкиле Николас Коро исә бу күренешнең төп сәбәбен халыкның үз-үзен тотышы үзгәрүдә күрә. "Арабызда шопоголиклар азайды. Халык алдын-артын уйламыйча кирәкмәгән товар сатып алудан тыела башлады. Хәзер кибетләрдә сөлге буе исемлек тотып, кирәк-ярак алып йөргән кешене дә бик сирәк очратасың. Хәтта бер атнага җитәрлек азык-тө­лек запасын да халык төрле кибетләрдән туплый. Күп­ләр бер җирдә яшелчә, балык арзанрак булса, икенче бер сәүдә ноктасында ит очсызрак, дип сөйләшә баш­лады", - ди белгеч.

Ә февраль аеның соңгы кө­нендә Халыкара сирәк оч­рый торган чирләр көне билгеләп үтелә. Мондый патологияләр аркасында кешеләрнең сәламәтлеге какшый, гомерләре кыс­кара. Сирәк очрый торган авыруларның бик аз өлешен генә дәвалап була дип исәпләнә. Дөньяда мондый чирләр­нең саны 8 меңнән артык дип исәпләнә, шуларның 90 проценты - нәселдән килгән яки тумыштан булган авырулар.

Россиядә ничә кешенең си­рәк чирдән интегүен күрсә­түче төгәл саннар юк, чөнки мондый чирләрне ачыклау һәм диагноз кую авыр. Чирне ачыклау еллар буена дәвам итәргә мөмкин. Табибларның фаразлавынча, Россиядә сирәк чирләр белән интегү­че­ләр­нең саны - якынча 1,5 млн.