Диверсия короле: Якташыбыз Гатулла Минаев 25 яшендә Советлар Союзы Герое исеменә лаек була
Быел илебез халкы Җиңүнең 80 еллыгын каршы алырга әзерләнә. Нәкъ 80 ел элек безнең халык, тиңдәшсез каһарманлык үрнәкләре күрсәтеп, кешелек дөньясына үлем белән янаган фашистлар армиясен тар-мар итүгә иреште. Бу канлы көрәшнең кайтавазы әле бүген дә йөрәкләрне сыкрата, ветеран-сугышчыларның оныклары янә баш калкыткан неонацизм белән көрәшә. Актаныш районы Ватаныбызга 5 Советлар Союзы Герое биргән төбәк. Баян Дәүләтов, Хәсән Заманов, Николай Орлов (Гатаулла Минаев), Гомәр Һадимөхәммәтов, Сергей Фадеевның бюстлары Актанышның Җиңү паркын бизәп, горурлык хисләре уята. Хәзерге Актаныш, элеккеге Калинин районы Исәнсеф авылында туган Гыймазетдин Вәҗетдинов, Калинин районы Бүләк авылыннан Илдар Мәннәнов та безнең батырлар. Тагын бер исемле героебыз- Польшаның милли Герое Александр Кузнецов. Аларның һәрберсе турында сайтыбыздагы «Бөек Җиңүгә 80 ел!» рубрикасында сөйләячәкбез. Бүгенге язмабыз- 25 яшендә Советлар Союзы Герое исеменә лаек булган Николай Орлов- Гатаулла Минаевның батырлык юлын чагылдыра.
