Россиянең иң эре аракы һәм спирт җитештерүчеләре берләшергә мөмкин

Татарстан Хөкүмәтенә караган «Татспиртпром» өчен мондый адым — үз позицияләрен федераль дәрәҗәдә ныгыту мөмкинлеге булса, «Росспиртпром» өчен исә ул — чимал сату өчен өстәмә, тотрыклы канал булдыру юлы.

«Коммерсантъ» хәбәр итүенчә, басма редакциясе генераль директор Руслан Максудов имзалаган һәм базар катнашучыларына юлланган рәсми хат белән танышкан. Документта «илдә иң эре спирт җитештерүче — АО “Росспиртпром” белән стратегик бергәләшү мөмкинлеге» каралуы турында әйтелә. Моннан тыш, хатта ике предприятие дә берләшкән очракта операцион мөстәкыйльлекләрен саклаячаклары, ләкин уртак структура кысаларында эшләячәкләре ассызыклана.

Алдан фаразланган планнар буенча, яңадан төзеләчәк холдинг Казанда теркәлергә тиеш; баш офисны да нәкъ башкалада урнаштыру күздә тотыла. Руслан Максудов фикеренчә, бу Татарстанга «салым базасын киңәйтү мөмкинлеге бирәчәк».

«Татспиртпром» вәкилләре хатның барлыгын кире какмады, әмма «Коммерсантъ»ка «мәгълүмат әлегә рәсми дәрәҗәгә күтәрелмәгән, имеш-мимешләр дәрәҗәсендә генә кала» дип белдерде.