Язгы чакырылыш башланды

1 апрельдән Россия Федерациясендә язгы чакырылыш башланды. Башка еллар белән чагыштырганда, аның үзгә яклары шактый. Беренчедән, агымдагы елның 1 гыйнвареннән гражданнарның дәүләт һәм муниципаль хезмәте турындагы Федераль канунга кергән үзгәрешләр нигезендә, сәбәпсез хәрби хезмәттә булмаганнарга дәүләт һәм муниципаль хезмәткә урнашу авырлаша. Икенчедән, 2014 елның язгы чакырылыш нәтиҗәләре буенча, хәрби хезмәттән качып йөрүчеләргә хәрби билет урынына белешмә генә биреләчәк. Хәрби хезмәткә алынучыларның сәламәтлекләренә карата таләпләр дә берникадәр үзгәреш кичерде.