Кызыл карлыганнан желе

Быел кызыл карлыган аеруча уңды. Тик күп кенә бакчачылар кызыл карлыганны үстерсәләр дә, аннан кайнатма ясарга яратмыйлар. Ә бит аны ак карлыган белән кушып, яисә үзеннән генә бик тәмле компот ясап була. Кызыл карлыганнан ясалган желе да бик тәмле килеп чыга. 

Моның өчен 11 стакан кызыл карлыганны 5 стакан суга салып, 5-10 минут чамасы пешереп алабыз. Әзер массаны сөзгечтән сөзеп 8 стакан шикәр комы салып, 5-10 минут кайнатабыз. Аннан сүндереп, тагын 7 стакан шикәр комы салып, эреп беткәнче болгатабыз, кайнар вакытта банкаларга тутырып куябыз. 

Икенче ысул өчен 1 килограмм кызыл карлыган, ике әфлисун, 1 килограмм шикәр комы кирәк. Юылган карлыганга 200 грамм су салып, кайнап чыкканнан соң, салмак утта 5-7 минут пешерәбез. Аннан сөзеп, ике әфлисунның суын сыгып салабыз, шикәр комының яртысын кушып, сигез минут кайнатабыз. Уттан алгач, калган шикәрне кушып, эреп беткәнче болгатабыз да, кайнар килеш стерильләштерелгән банкаларга тутырабыз.