Казанда яшәүче хатын-кызны автобуста битлексез барган өчен штрафка тартканнар

(Казан, 2 октябрь, «Татар-информ», Гүзәл Хөсәенова). Казанда яшәүче хатын-кызны автобуста битлексез барган өчен штрафка тартканнар.

Бүген Яңа Савин районында битлек режимын бозучыларны ачыклау максатыннан рейд узды. Полиция хезмәткәрләре үзләре кергән беренче автобуста ук иминлек чараларын үтәмәгән бер кызны күреп алды.

«Мин автобуста хастаханәдән кайтып килә идем. Битлекне шунда онытып калдырганмын», — дип акланды кыз автобустан чыкканда.

Кызга тукталышта ук беркетмә төзеделәр. Хәзер аңа бер меңнән утыз мең сумга кадәр штраф түләргә туры киләчәк.

Бер сәгать эчендә полицейскийлар битлек режимын бозган өч кешене очратты һәм алты пассажир белән профилактик әңгәмәләр үткәрде.