Киров авылы хатын-кызлары маскировка челтәрен хәзер көрән төстән үрәләр

Районыбызда маскировка үрү эше берьюлы Киров, Яңа Әлем, Мари Суыксуы, Зөбәер авылларында башланып киткән иде. Челтәр үрү җайланмасы кысаларын авылларга районыбызның "Без-бергә!" волонтерлар хәрәкәте җитәкчесе Гөлинә Иделбаева таратып чыга, ә челтәр үрергә Яңа Әлем волонтеры Гөлчәчәк Фасихова килеп өйрәтә.

Кировта махсус хәрби операциядәге егетләргә атап, берничә тапкыр гуманитар ярдәм җыйган иделәр. Бу хәйрия акчасыннан маскировка материалына да өлеш чыгарганнар. 

Маскировка өчен 250 метрлы ике рулон спандбондны Санкт-Петербург шәһәреннән кайтартканнар. Авылның мәдәният йортында оештырылган өмәләрдә хатын-кызлар актив катнаша. Эш иртәннән кичкә кадәр кайнап тора. 

-  Хәзер маскировка үрергә остардык, бик җитез эшли башладык. 20 метрлы маскировка челтәрен үрдек инде. Егетләр, артык озын кирәкми, челтәрләрнең зурлыгы бер машинаны капларлык булса, җитә, диделәр. Авылдашларыбыз Венера Сабитова, Сәгыйдә Хөрмәтуллина, Альмира Рәшитова, Наилә Мирхәйдәрова, Зәмзәмия Миргалимова, Дифинә Хафизова, Гүзәл Сәмигуллина, Әзһәмия Гизамова, Зөһрә Кәрамуллина, Ләйсән Сәетова, Энҗе Сибгатуллина, Роза Шәйхелмәрданова, Рәвия Хәлилова, Валя Әшрәфуллина, Рәмзия Ялалова һәм Фәйрүзә апалар даими киләләр. Вакытларын жәлләмичә, дошман белән көрәшүче егетләргә ярдәмнәре өчен зур рәхмәт!,- волонтерлар,  күпбалалы ана Венера Сабитова  белән Валя Әшрәфуллина.