Актаныш

Язның беренче аен ничек үткәрергә?

Иртәгә язның беренче көне, ә һәр елны, кыш беткәндә, без барыбыз да яңалыклар көтәбез, елның иң матур вакытына зур өметләр белән аяк басабыз. Бу елгы яз синең тормышыңны, һичшиксез, яхшы якка үзгәртәчәк! Язмада без сиңа үзгәрешләр исемлеген тутырырга әзрәк ярдәм итәчәкбез.

             1. Үзеңә социаль челтәрләрсез бер көн бүләк ит

    Гомумән, Интернетка керүдән бер көнгә баш тартып тор. Анда шулкадәр күп кирәкмәгән мәгълүмат җыелган. 24 сәгать булса да аларны укымый, телефоныңны кулга алмый торсаң, кәеф 100% шәп булачак! Аннан соң шулай итеп син үзеңне сынап та карыйсың бит әле. Түземлегеңнең күпмегә җитәчәген тикшереп карый аласың.

 2. Үзеңне сөендер, кечкенә сюрпризлар яса

    Мәктәп укучысымы, студентмы, әллә инде берәр җитди эштә эшлисеңме – анысы мөһим түгел. Үзеңне кайгыртырга дөрес итеп вакыт бүлеп, кәефне күтәрә торган әйберләр эшләргә ашык.

 3. Яңа шөгыль белән таныш

    Бу киңәш бик баналь яңгыраса да, ул актуаль. Инде күптәннән теләгән эшең белән шөгыльләнә башларга вакыт җитте! Булдыра алмам дип уйлаган, иң авыр тоелган шөгыльгә дә игътибарыңны юнәлтеп кара әле. Бәлки киләчәктә ул шөгыль генә булып калмыйча, синең һөнәреңә әверелер.

  4. Һәр иртә йөгерә башла

     Менә монысы инде, кызлар, егетләр, көзгегә карап, үз-үзебезгә иң еш әйтелә торган җөмлә. Ләкин нишләптер без аны гел кичектерәбез, һәр атнаның дүшәмбесеннән “башлыйбыз”. Кыскасы, язның беренче аенда бу эшне чын-чынлап башлап җибәрергә кирәк дип уйлыйбыз. Сәламәтлек өчен дә файдалы, кәеф тә яхшырыр. Гомумән, дөрес яшәү рәвешен алып барыр өчен яз – иң яхшы мөмкинлек.

 5. Имиджыңны үзгәрт

    Яшәү рәвешен генә үзгәртеп калмыйча, үзеңнең тышкы кыяфәтеңне, кием стилеңне дә үзгәртергә киңәш итәбез. 2022 елның мартында мода индустриясендә нинди яңалыклар көтелгәнен карап чык, иң текә lookларга күз сал. Тиздән кар эри, көннәр җылыта, димәк, иң кыю идеяләреңне тормышка ашырырга вакыт җитә.

 6. Бүлмәңне яңарт

     Үз бүлмәңә яз исе, яз төсе өрергә киңәш итәбез. Обоиларны алыштыр, якты төсләр куллан, матур-матур рәсемнәр эл, чәчәкләр тез. Кыскасы, фантазияңә ирек бир!

 7. Курсларга языл

    Чит тел өйрәнү, актёрлык, маникюр курслары...Хәзер интернет аша да күбесен җиңел узып була бит. Үзеңне сынап карау, күңелле итеп вакыт үткәрү өчен бу шәп вариант.

 8. Дусларың белән ешрак күрешә башла

    Яз көне өйдә ятмаска тырыш, күбрәк яңа кешеләр белән таныш, дусларың белән кызыклы чараларга бар, илебезнең матур шәһәрләре буенча сәяхәт ит.

       Чыганак: Ялкын

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: