АКТАНЫШТА ФУТБОЛ ЧЕМПИОНАТЫ: Оешмалар туп тибә - стадион гөр килә

Актанышның үзәк стадионы бер генә көндә буш тормый. Райондашларыбыз сәламәт яшәү рәвешенә ныграк тартыла дигән сүз бу. Июнь аеннан башлап биредә авыл җирлекләренең командалары туп типсә, 6 августта чемпионат эстафетасын район үзәгендә урнашкан оешма-предприятиеләр кабул итеп алды. 

Шунысын да искәртү урынлы, авыл җирлекләре әлеге районкүләм чарага җитди якын килгән иде, ягъни чемпионатта аларның һәммәсе катнашты. Оешма-предприятиеләр исә сүлпәнрәк булып чыкты. Башкарма комитетның яшьләр эшләре, спорт һәм туризм бүлеге һәр оешмага аерым чакыру җибәрсә дә, нибары 8 команда гына аны кабул иткән.  Шул рәвешле, Түбән Кама сусаклагычын эксплуатацияләү идарәсе, балалар һәм яшүсмерләр спорт мәктәбе, “Лачын" боз-спорт сарае, кече нефть компаниясе, район хакимияте, район үзәк хастәханәсе, Актаныш технология техникумы, мәдәният бүлекләре арасында гына дәвам итә футбол чемпионаты. 

Командалар 7 көнлек уен күрсәтте инде. 30 августка чемпионатны йомгакларга исәп тота оештыручылар. 
Нәтиҗәләргә килгәндә, алар түбәндәгечә: 
6 август
“Лачын" боз-спорт сарае – район мәдәният бүлеге, исәп  1:3
7 август
Түбән Кама сусаклагычын эксплуатацияләү идарәсе – район үзәк хастәханәсе, исәп 3:1
9 август
Район үзәк хастәханәсе - “Лачын" боз-спорт сарае, исәп 0:5
13 август
Район мәдәният бүлеге - кече нефть компаниясе, исәп 1:2
14 август
Кече нефть компаниясе - район үзәк хастәханәсе, исәп 5:0
15 август 
Балалар һәм яшүсмерләр спорт мәктәбе - район мәдәният бүлеге, исәп 3:1
16 август
“Лачын" боз-спорт сарае - Түбән Кама сусаклагычын эксплуатацияләү идарәсе, исәп 6:0
Балалар һәм яшүсмерләр спорт мәктәбе - район үзәк хастәханәсе, исәп 11:0

20 август көнне үзәк стадионда район хакимияте командасы район үзәк хастәханәгә каршы уен күрсәтәчәк. Ул бик “кызу” булырга охшый. Сез дә килегез, бергәләп җанатарбыз! Футбол чемпионаты 18.00 башлана.