Актаныш районының берничә мәктәбе яңа уку елын яңа җитәкчелек кул астында башлаячак.
Әлеге исемлектә Татар Суксу, Киров урта мәктәпләре, Татар Ямалы, Яңа Әлем, Теләкәй төп гомуми белем бирү мәктәпләре, Балалар иҗат үзәге бар.
Шул рәвешле, 2018-2019 уку елында Татар Ямалы мәктәбе белән Гөлназ Фәйрушина җитәкчелек итәчәк. Моңа кадәр Гөлназ Гилмегаян кызы Татар Суксу урта мәктәбендә тарих укытучысы вазыйфасында хезмәт куйды.
Соңгы елларда Татар Ямалы төп гомуми белем бирү мәктәбендә директор булган Илнур Таһир улы Хуҗин яңа уку елын “Балалар иҗат үзәге” балаларга өстәмә белем бирү оешмасы җитәкчесе буларак башлап җибәрәчәк.
Киров урта мәктәбе директоры итеп Гарипов Даниал Дәниф улы билгеләнде. Даниал Дәниф улы райондашларыбызга шактый еллар Яңа Әлем төп гомуми белем бирү мәктәбен җитәкләгән тәҗрибәле директор буларак таныш.
Яңа Әлем мәктәбе директоры вазыйфалары исә Илназ Шәриповка йөкләтелде. Моңа кадәр Илназ Илшат улы Актаныш районы мәгариф идарәсе методисты булып эшләде.
Шулай ук Теләкәй төп гомуми белем бирү мәктәбе коллективын да яңарыш көтә. Әлеге мәктәп белән Газизов Гадел Фирдәвис улы җитәкчелек итәчәк. Ул Иске Кормаш мәктәбендә җәмгыять белеме фәнен укытты.
Иске Кормаш мәктәбе директоры булып хезмәт куйган Газизов Фидан Фирдәвис улы да җитәкчелек вазыйфаларын Татар Суксу урта мәктәбендә дәвам итәчәк.
Әлеге вазыйфаларга билгеләнгән җитәкчеләргә эшләрендә уңышлар телибез!
Район мәгариф тармагындагы кадрлар үзгәреше моның белән генә тәмамланмаячак, билгеле. Ни өчен дигәндә, районның башкарма комитет җитәкчесе Э.Н.Фәттахов белем бирү йортларын ныклы, ышанычлы кадрлар белән тәэмин итүне максат итеп куйды. Ә моңа ирешү өчен, беренче чиратта, директорлар корпусын тәҗрибәле җитәкчелеләр белән тулыландыру шарт. Бу нисбәттән 29 июнь көнне үткән 25 форма киңәшмәдә Яр Чаллы Дәүләт Педагогия университетының беренче проректоры, педагогика фәннәре докторы, профессор Мөхәммәтшин Азат Габделхак улы район җитәкчелеге, мәктәп директорлары белән очрашты. Эшлекле киңәшмә барышында киләчәктә Актаныш районының Яр Чаллы Дәүләт Педагогия университеты белән бердәм эшчәнлеге хакында нәтиҗәле сөйләшү булды.
Әлбәттә, яңа уку елыннан үз көченә керәчәк яңарышлар мәктәпләрдәге кадрлар җитмәүчелек мәсьәләләрен дә уңай якка үзгәртер дип ышанасы килә. Чөнки бүгенге көндә район мәктәпләрендә фән укытучыларының җитмәве киләчәктә тагын да киеренкерәк хәл тудырырга мөмкин. Район мәгариф идарәсеннән алынган соңгы мәгълүматләрдән күренгәнчә, Актаныш районына математика, химия, биология, рус , инглиз телләрен укытучы педагогик кадрлар җитешми.
Шунысын да искәртеп үтү урынлы, быел Актаныш районы ТР Мәгариф һәм фән министрлыгының мәгариф өлкәсендә күзәтчелек итү һәм контрольдә тоту департаменты тарафыннан тикшерү үтәчәк районнар исемлегенә кертелгән.
фото Актаныш-информ архивыннан алынды
Иң мөһим һәм кызыклы язмаларны Татмедиа Telegram-каналында укыгыз
