Татарстанда электр самокатлары турында Юл хәрәкәте кагыйдәләренә төзәтмәләр турында фикер алыштылар

Соңгы айларда Татарстан халкы электр самокатлар һәм сегвейлар катнашында төрле гадәттән тыш хәлләр турында кайнар фикер алыша. Бу транспорт күптән түгел пәйда булды, әмма аларда йөрүчеләр җәяүлеләрне дә, машина йөртүчеләрне дә, үзләрен дә куркыныч астына куя.

Республиканың баш дәүләт автоинспекторы Ленар Габдерахманов сүзләренә караганда, ел башыннан Татарстанда электр самокатлары катнашында 13 юл-транспорт һәлакәте булган, аларда бер кеше һәлак булган һәм унөч кеше төрле тән җәрәхәтләре алган.

«Электр самокатлары, электроскейтбордлар, гироскутерлар, сегвейлар, монотәгәрмәчләр тизлекне сәгатенә 80 километрга кадәр үстерә ала, бу машина йөртүчеләр өчен дә, җәяүлеләр өчен дә җитди куркыныч чыганагы булып тора. Быел Татарстанда электр самокатлары катнашында һәлакәтләр саны өч тапкыр артты», - дип сөйләде Габдерахманов.

Әйтик, 20 августта Кремль яр буенда электр самокат йөртүче 60 яшьлек ханымга юл бирмәгән, аны бәреп еккан һәм качып киткән. Ә бит ханым  «зебра» буенча юл аркылы чыга торган була. Юл-транспорт һәлакәте нәтиҗәсендә, хатын-кыз  баш мие селкенүе, имгәнү ала.

Татарстан ЮХИДИндә узган түгәрәк өстәлдә катнашучыларның барысы да юл хәрәкәте кагыйдәләрен тиз арада тулыландырырга кирәк дигән фикергә килде. Иң элек самокатта кем барганын - җәяүлеме яки машина йөртүчеме дип билгеләү яхшы булыр иде.

Электр самокатлары белән хәлне катлауландыра торган проблемаларның берсе - аларны арендага алырга җиңел. Шәһәрләрдә прокат пунктлары биһисап, һәм самокат алу өчен машина йөртү таныклыгы кирәкми.

"Самокатларны төрле кушымталар аша арендалау аларның егәрлеген исәпкә алмыйча башкарыла. Монда хәтта бернинди документлар да кирәк түгел, бары тик банк картасы гына кирәк. Шул ук вакытта арендаланган самокаттан башка кеше файдалана ала», — дип билгеләп үтте Габдерахманов.

Хәзер, юл хәрәкәте кагыйдәләре буенча, төрле шәхси мобиль чараларда йөрүче кешеләр җәяүлеләргә тиңләшә. Әйтик, балалар һәм яшүсмерләр яраткан роликлы тимераяклар һәм самокатлар шуның  астына эләгә. Шул ук вакытта күп кенә электр самокатларының куәте сәгатенә 0,25 кВт кадәр һәм сәгатенә  50 км  кадәр тизлек җыя — нәкъ менә алар, ЮХИДИ хезмәткәрләре фикеренчә, «мопед» билгесенә туры килә.

«Мопедка электр двигателе 0,25 кВт һәм 4 кВт кимрәк булган транспорт чаралары керә. Мондый транспорт чарасы белән идарә итү өчен кешенең машина йөртү таныклыгы булырга тиеш. Димәк, мондый электр белән идарә итүче зат машина йөртүчегә тиң булачак", - диде Габдерахманов.