Район җитәкчелеге фермерлар белән очрашты

            Киңәшмә эшен  район авыл хуҗалыгы һәм азык-төлек идарәсе башлыгы Нәфис Салимгәрәев ачып җибәрде. 

Актаныш районы башлыгы Ленар Зарипов фермерларга районыбызның финанс-икътисад үсешенә зур өлеш кертүләре өчен рәхмәт белдерде, җаваплы хезмәтләрендә уңышлар теләде, райондагы авыл хуҗалыгы җирләрен нәтиҗәле куллануларын таләп итеп куйды.

            Игенчелек, терлекчелек өлкәсен колачлаган фермерларның гомуми эшчәнлегенә анализны район авыл хуҗалыгы һәм азык-төлек идарәсенең финанс-икътисад бүлеге җитәкчесе Дилүс Мөхәммәтдинов ясады. 

           Басу культураларын тәрбияләү, җир белән эшләүгә кагылышлы кагыйдәләр, законнар, дәүләт ярдәме- субсидияләр белән "Россия авыл хуҗалыгы үзәге" җитәкчесе Әфка Сәрвәров таныштырды.

            Механизация бүлеге җитәкчесе Рушан Мөхәммәдиев фермерлык белән шөгыльләнүчеләрнең машина-трактор паркына характеристика бирде. Язгы кыр эшләре алдыннан һәм көзге чәчүне югалтуларсыз башкарып чыгу өчен техникаларга сыйфатлы ремонт кирәклеген ассызыклады. Яңа авыл хуҗалыгы машиналарын, агрегатларын сатып алу өчен дәүләт тарафыннан бирелә торган  субсидияләр- лизинг программалар хакында аңлатты.

            Район ветеринария берләшмәсе җитәкчесе Фиргать Абдрахманов районга читтән яңа терлек сатып алганда һәрвакыт истә тотарга тиешле таләпләр турында сөйләде.

Мал торакларын даими дезинфекцияләүнең әһәмиятен ассызыклады. Илдә барган мөһим компания- цифровизация кысаларында терлекләрне биркалау чыгымнарының дәүләт тарафыннан финанслануын җиткерде.

             Татарстан Республикасы Эшмәкәрлекне үстерү фондының район бүлеге җитәкчесе Алмаз Нурлыев эшмәкәрләргә бирелүче финанс ярдәмнәре, микрозайм программалары туырндагы яңалыкларны җиткерде.

                  Фермерлар белән очрашуны Ленар Рафак улы йомгаклады. Киңәшмәне ачкандагы фикерләрен дәвам итеп җирнең кадерен белеп эшләргә чакырды. Быел район хуҗалыкларының басуларын караганнан соң, фермерларның да  язгы чәчүнең башкарылу сыйфаты тикшереләчәк. Җиргә хөрмәт белән карамаган, эшкәртмәгән хуҗаларга чаралар күреләчәген искәртте.