«Без бергә» фонды волонтёрлары махсус хәрби операциядә катнашучы якташыбызны кызы тууы белән котладылар

Яр Чаллы шәһәрендә якташыбыз, махсус хәрби операциядә катнашучы, «Белый» позывнойлы Руслан Гайсинның һәм аның тормыш иптәше Илсөярнең кызлары дөньяга аваз салды. Актанышның «Без бергә» фонды волонтёрлары Лилия Гикрамина белән Фирдания Нуруллина җылы һәм күңелле очрашу булып кайттылар, яшь әти-әнинең шатлыкларын уртаклаштылар. 

Яшь әти-әнинең бу тәүге сабыйлары. Нәни кызчык Амелия исемле. Фонд волонтёрлары гаиләне тәүге балалары тууы белән котлап, ихлас теләкләрен һәм җылы сүзләрен җиткерделәр.

— Русланга һәм Илсөяргә гаилә бәхете, иминлек, ә кызларына ныклы сәламәтлек теләдек, — диде Лилия Әхнәфовна.

31 гыйнвар иртәсендә Руслан Гайсин кабат махсус хәрби операция зонасына юл тота. Аңа һәм барлык сугышчыларга җиңү белән үз гаиләләренә сау- сәламәт килеш кайтуын телибез.