«Ватанга хезмәт итәм!»: Хәсән Заманов исемендәге кадет мәктәбе республикада сынатмады

Әлеге уңайдан Район башкарма комитеты җитәкчесенең социаль мәсәләләр буенча урынбасары Дилбәр Әнвәрова бәйгенең җиңүчеләре һәм призёрларын, аларның укытучыларын һәм әти-әниләрен кайнар котлады. Үзенең чыгышында ул һәр уңышның артында никадәр зур түземлек һәм җаваплылык торуын ассызыклады.

«Җиңүләр артында — йокысыз төннәр һәм зур хезмәт тора»

Дилбәр Әнвәрова кадетларның һәм барлык катнашучыларның хезмәтен югары бәяләп, аларга рәхмәт сүзләрен җиткерде:

«Урын алу, җиңү яулау — бер мәсьәлә, без бүген монда кул чабып, сөенеп утырабыз. Ләкин һәр казанышның артында күпме хезмәт, күпме йокысыз төннәр, иҗади борчулар ятканын онытырга ярамый! Шуның өчен барлык кадерле балаларыбызга, хөрмәтле укытучыларыбызга һәм әти-әниләргә бик зур рәхмәт әйтәсе килә», — диде ул.

Ераклыкны якын иткән бердәмлек

Чыгышта районнан читтә — Казанда узган югары дәрәҗәдәге бәйгеләрдә катнашуны оештыруның җиңел булмавы да билгеләп үтелде. Район үзәге Казаннан шактый ераклыкта урнашуга карамастан, балаларны вакытында йөртү, аларга барлык шартларны тудыру зур оештыру эшен таләп итә.

Дилбәр Әнвәрова олимпиада кампаниясен югары дәрәҗәдә оештырырга ярдәм иткән җитәкчелеккә аерым рәхмәтен белдерде:

• Мәгариф бүлегенә һәм аның җитәкчесе Раниза Шакировага — Казанга бару-кайтуларны, олимпиада тупланышын тиешенчә оештырганнары өчен;

• Район башкарма комитеты җитәкчесе Илфак Бариевка һәм район башлыгы Ленар Зариповка— яшь талантларга һәрьяклап ярдәм итеп, республика дәрәҗәсенә чыгу мөмкинлеге тудырганнары өчен.

«Балаларыбызның башта районда катнашуы — бер мәсьәлә, ә аларны менә шундый заманда республика дәрәҗәсендәге бәйгеләрдә катнаштыру өчен зур ярдәм кирәк. Бу зур оештыру эше өчен барлык укытучылар, укучылар һәм ата-аналар исеменнән олы рәхмәтемне җиткерәм», — дип ассызыклады башкарма комитет җитәкчесе урынбасары.

Алга таба да зур уңышларга!

Тантана ахырында Дилбәр Әнвәрова Хәсән Заманов исемендәге кадет мәктәп-интернаты укучыларына һәм укытучыларына рәхмәт хатлары, акчалата бүләкләр тапшырды.

«Барлыгыгызга да киләчәктә зур уңышлар телим! Сезнең менә шушы сайлаган юлларыгыз, алган белемнәрегез алдагы тормышыгызда һәрвакыт файдалы булсын, фәкать яхшылыкка гына хезмәт итсен иде», — дигән теләктә калды ул.

Актанышның яшь кадетларын, хәрби-патриотик юнәлештә һәм фән дөньясында сынатмаган җиңүчеләрне, аларның остазларын чираттагы зур казанышлары белән котлыйбыз! Сез — районның һәм илнең ышанычлы киләчәге!