Киң күңелле син, әй, халкым: Актаныш чәкчәкләре Бурденко госпиталенә барып җитте

Районыбызның изге күңелле, олы йөрәкле волонтеры, күпбалалы ана Венера Сабитованың Мәскәүдәге Н. Н. Бурденко исемендәге госпитальгә авыр яралалы авылдашы янына баруы турында язган идек. Венера ханым ире Алмаз белән солдатларга Яңа ел бәйрәме алдыннан кабат барырга сүз бирә. Әманәтен җилгә очырмый волонтерыбыз, госпитальдәге вәзгыятьне авылдашларына, дусларына да сөйли. Россиянең киләчәге өчен җаннарын фида кылырга әзер сугышчыларга бар район халкы ярдәм әзерләде. Эшмәкәрләр дә читтә калмады. Венера һәм Алмаз Сабитовлар, эшмәкәр егетләр Рамил Ибраһимов, Аяз Мирсалихов, Илгиз Хуҗин Актаныш районы халкы ярдәме белән җыелган күчтәнәчләрне яралы егетләргә, табибларга, шәфкать туташларына, башка медицина персоналына илтеп тапшырды.

Биредә безнең герой  райондашыбыз, махсус хәрби операциядә контузияләнгән, кулын өздергән Киров авылы егете Альберт Җиһангиров та дәваланган иде. Хәзер Альбертны Сергиев- Посад шәһәрендәге клиникага күчергәннәр. Шулай итеп волонтерларыбызга Бурденко госпиталеннән тыш Сергиев- Посадка да барырга туры килә. Әле Мәскәү өлкәсенең Краснознаменск шәһәренә дә киләләр. Биредәге хәрби госпитальдә Актанышбаш авылыннан махсус хәрби операциядә яраланган, таҗик миләтеннән булган Өмет Раджапов ята. Аны күрергә, хәлен белергә апасы Ниса волонтерлар төркеме белән Мәскәүгә юл тота. Менә шулай итеп Киров, Олыимән, Усы, Иске Сәфәр авылы халкы әзерләгән күчтәнәчләр төрле госпитальләргә исән-сау барып җитте. 

Актаныш волонтерлары хәрби госпитальләргә үзләре белән киләчәккә өмет, шәфкать, миһербан нуры алып килделәр.

Сез үзегезнең никадәр олы эш эшләгәнегезне аңлап та бетермисез. Сез бездә яшәргә өмет уты кабыздыгыз. Без кешеләргә үзебезнең кирәклекне аңладык, без яралы булсак та, халыкка кирәк икәнбез бит!- дип, күз яшьләре белән рәхмәт әйтә гарипләнгән солдатлар.

Ә күчтәнәчләрдән авыз иткәч, бу батырларның кәефләре тагы да күтәрелә. Үзебезнең милли ризыкларыбызны әзерләүдә Актаныш эшмәкәрләренең өлеше зур булды. Рузалия Гәрәеваның кафесы 100 данә гөбәдия пешергән, ит кибете хуҗасы Аяз Гәрәев ат итеннән сало, ветчина әзерләп җибәргән. Казылыклар, чәкчәкләр, тәм-томнар, көнкүреш кирәк-яраклары- барысы да үзебезнең геройлар, кемнеңдер кадерле баласы, ире, туганы өчен, илебезнең киләчәге өчен үз-үзен аямауларына олы рәхмәт һәм хөрмәт билгесе бит ул. 

Гуманитар ярдәм әйбер илтү чикләрен узып китте. Чөнки солдатларга гуманитар ярдәм тапшыруга Мәскәүдә урнашкан  Россия мөселманнары Диния нәзарәте дә кушылды. Мәскәү шәһәренең Җәмигъ мәчете имамы, «Россия офицерлары» Гомумроссия иҗтимагый оешмасының Мәскәү бүлеге Президиумы әгъзасы Марат хәзрәт Аршабаев якташларыбыз белән бергә госпитальгә килде. 

Марат хәзрәт биредә дәваланучы мөселман солдатларына Изге Коръәннән аятьләр укыды,   Аллаһы Тәгаләгә ялварып, сугышчыларының тизрәк савыгуын теләп, догалар укыды, егетләрне бирешмәскә, күңел төшенкелегенә бирелмәскә өндәп үгет-нәсихәтләрен җиткерде.

Якташларыбызны Баш хәрби клиник госпитальнең 21 нче ашыгыч хирургия бүлегенең өлкән шәфкать туташы Эльмира Старикова һәм госпитальнең башка медицина персоналы каршы алды, солдатлар белән очрашулар оештырды.

Госпиталь коллективы да, яралы сугышчылар да  бу кадәр олы ярдәм өчен олы рәхмәтләрен белдерделәр. 

Хәзерге вакытта районыбыз волонтерлары кайтыр юлда. Алар исән-сау туган ягыбызга кайтып җитеп мәрхәмәтле гамәлләрен дәвам итәр дигән теләктә калабыз.