Мамадыш әдәбият сөючеләрне җыйды

Ул күренекле әдип Шәйхи Маннурны искә алуга багышланган чаралар белән башланып китте. Туган авылы Тулбайда каберенә чәчәкләр салынды, рухына дога багышланды. Быел аның китапханәсенә 60 ел тула. Татарстанның халык шагыйре, Тукай премиясе лауреаты Зиннур Мансуров Шәйхи Маннур кебек үз акчасына китапханә салдырган һәм аны китаплар белән тәэмин итеп торган әдипнең Татарстанда башка булмавын ассызыклап үтте. Шәйхи аганың Мамадыштагы һәйкәле янында да аны искә алу митингы үткәрелде. Анда шәһәр мәктәпләре укучылары, татар теле укытучылары, китапханәчеләр, әдәбият сөючеләр каршында муниципаль район башкарма комитеты җитәкчесенең социаль мәсьәләләр буенча урынбасары Алена Смирнова, Татарстан Язучылар берлеге идарәсе әгъзасы Зиннур Мансуров, Чаллы Язучылар оешмасы җитәкчесе Факил Сафин, Шәйхи Маннурның мирас комиссиясе рәисе Шаһинур Мостафин чыгыш ясап, әдипнең иҗаты бүген дә актуаль булуын, Мамадыш төбәгеннән соңгы елларда бик күп әдипләр үсеп чыгуында аның да йогынтысы зурлыгын билгеләп үттеләр. Композитор Яруллиннар исемендәге балалар сәнгать мәктәбенең актлар залында узган кичәдә Шәйхи Маннур исемендәге премиянең быелгы лауреатлары исемнәре игълан ителде, аларга дипломнар тапшырылды.

Мамадыш төбәге талантларын барлауда керткән өлешләре, Мөхәммәт Шәйхинең "Якты чишмә" китабын әзерләп чыгарганы өчен, әдип, "Көмеш кыңгырау" газетасы баш мөхәррире-директоры Факил Сафин; балаларга багышланган күпсанлы китаплары өчен шагыйрь Ринат Нуруллин; матбугат битләрендә дөнья күргән шигырьләре һәм парчалары өчен мамадышлы Люция Губина яңа лауреатлар булдылар.

Район үзәкләштерелгән китапханәләр системасы көче белән әзерләнгән кичәнең икенче өлеше Татарстан Язучылар берлегенең шәрәфле әгъзасы Вахит Галиевның 90 еллыгына багышланган иде. Муниципаль район башкарма комитеты җитәкчесе Илнар Фәттахов, иҗатташ дуслары, балалары унөч китап чыгарган шагыйрьгә саулык-сәламәтлек, озын гомер, тагын да зуррак иҗат уңышлары теләделәр.