Бакчада көткән ашыгыч эшләр

Июньдә быел алыначак уңышның җимшәннәре формалаша. Бу чорда агач-куакларны җитәрлек дәрәҗәдә дым белән тәэмин итү мөһим. Әгәр дә көннәр коры торса, яшь агачка 2-4, җимеш бирүче зур агачларга исә 10 чиләкләп су сибәргә киңәш ителә. Алар төбендәге туфракка дым 50 см. тирәсе үтеп керергә тиеш.

Агачка дым җитү-җитмәвен яшь ботакларга карап белергә мөмкин: әгәр дә июнь ахырына кадәр алар 20 см. дан азрак үскән икән, димәк, дым һәм туклану җитми дигән сүз. Нормада алар җәйнең беренче аенда 50 см. чамасы үсәргә тиеш.

Июньдә бакчаны минераль һәм органик ашламаларның сыек эремәсе белән сыйлыйлар, кәүсә тирәсендә үскән үсентеләрне төбеннән юк итәләр. Мүлчәләнмәгән кәүсә тирәсендә үскән чүп үләннәрен өзеп торыгыз. Аларны агач төбендә калдырыгыз, берьюлы мүлчәгез дә, органик ашламагыз да булачак. Истә тотыгыз: барлык культуралар арасында дымны иң нык сөюче булып карлыган куагы тора. Көннәр коры торганда аңа суны даими сибегез, юкса җиләкләре вак һәм тәмсез булуын көт тә тор!

Барлык агач һәм куак төпләрен черемә белән мүлчәләгез. Ул дымны да яхшы саклар, өстәмә ашлама булып та хезмәт итәр.