Бөек Җиңү көнендә Актаныш урамнарыннан "Үлемсез полк" үтте

 Ул стадионда узган тантаналы чаралардан соң башланып китте.

Төрле яшьтә булган райондашларыбыз сугышта катнашкан якыннарының портретларын олы горурлык хисе белән күтәреп барды. "Каһарманлык даны - мәңге үлемсез!" дип юкка гына әйтмиләр. Катнашучылар саны бик күп иде. Әлеге илебез күләмендәге патриотик акциягә барлык мәгариф учреждениеләре актив кушылды. Актаныш технология техникумы, 1 һәм 2нче санлы мәктәпләр, сәләтле балалар өчен гуманитар гимназия-интернат, Хәсән Заманов исемендәге кадет мәктәбе-интернаты укучылары, әти-әниләре, дәү әни һәм дәү әтиләре белән балалар бакчалары тәрбияләнүчеләре олуг теләк белән катнашты. Шулай ук бу изге ниятле акциягә Актаныш районы җирлегенең оешма-предприятиеләрендә хезмәт куючылар да кушылып, хезмәт коллективлары белән "Үлемсез полк"та үттеләр. "Үлемсез полк" -  Советлар Союзы герое Баян Дәүләтов исемендәге үзәк стадионнан кузгалып, Вахитов урамыннан Ленин проспектына таба (Газучасток), аска төшеп, Башкарма комитет бинасы янәшәсеннән Юбилей урамына борылып, Җиңү Паркына килде.

"Үлемсез полк" барышында Бөек Җиңүгә багышланган легендар җырлар яңгырады, һәркемдә бәйрәм рухы кәефе хаким итте.