Авыл җыеннарының чираттагысы район башлыгы катнашында Уразай җирлегендә узды

          Уразай авыл җирлеге башлыгы Гүзәлия Шәймәрданова 2022 елда башкарылган эшләргә хисап ясады, киләсе елга максат-бурычлар билгеләде.

         Уразай җирлегендә 854 кеше яши. Аларның күбесе, якын булгангамы, район үзәгенең төрле оешмаларында хезмәт куя. Бөтенләй читтә эшләп йөрүчеләр дә бар - алар 100 гә якын. 60 тан артык кеше исә "Нур" хуҗалыгында хезмәттә.

Биредә уртача хезмәт хакы 32 493 сум тәшкил итә. "Алдагы елларда әлеге күрсәткечне 35-40 мең сумга җиткерергә планлаштырабыз. Моның өчен бөтен мөмкинлекләр дә бар" ди хуҗалык рәисе Дәниф Харисов. 
             Район башлыгы Ленар Зарипов җыен барышында халыктан кергән сорау-мөрәҗәгатьләрне җавапсыз калдырмабыз дип искәртте. 

            Җыенда җирлек эшчәнлегендә актив катнашкан авылдашларга хөрмәтләп бүләкләр тапшырылды.

Актаныш районы хакимияте мәгълүмат үзәге материаллары нигезендә.