Бүгеннән һава торышы кискен үзгәрә: Юлларда сак булыгыз

                Иртәнге сәгатьләрдә Татарстанның аерым районнарында, шул исәптән Актанышта да синоптиклар буран чыгуын фаразлаган иде. Соңгы сәгатьтә чыннан да кар ява башлады һәм ул көчәйгәннән-көчәя. 

                 Хәзерге вакытта Актанышта -11 градус салкын. Иртәгә, 16 декабрьдә -3, -7 градуска кадәр җылыначак. Үзгәрүчән һава торышы аяк астында һәм юлларда бозлавык ясый. Машина йөртүчеләргә, шул исәптән җәяүлеләргә бу көннәрдә аеруча саклык, уяулык таләп ителә.

               Шулай ук метеосизгер райондашларыбыздан да сәламәтлекләренә игътибарлы булуларын сорыйбыз. Табиблар андый кешеләргә даруларын вакытында эчәргә киңәш итә.