Мирһади Разов: Бәхетле без, монда тудык, Барыбыз-Актаныштан!

Уебыз да актан безнең,
Күренә кылган эштән
Шулай булмый мөмкин түгел,
Барыбыз-Актаныштан.

Моңнарыбыз да ак безнең
Күңелебездән очкан
Җырыбызның, хисебезнең
Чишмәсе Актаныштан.

Саф татарча сөйләшәбез,
Телебез былбыл коштан
Татар иле башлана ул,
Бары тик Актаныштан.

Ачык йөзле кешеләре,
Юк бездә юньсез, куштан
Бу уңган җан кайдан дисәң,
Була ул-Актаныштан.

Сөн буенда сандугачлар
Оя кора камыштан
Йөрәкләргә дәрман алдык,
Туган җир- Актаныштан.

Агыйделкәй дулкынлана,
Парлап йөзгән аккоштан
Бәхетле без, монда тудык,
Барыбыз-Актаныштан!