Укучыларыбыз техник иҗатка елдан-ел күбрәк тартыла

Ярышларның нигезләмәсе 7 яшьтән алып 13 яшькә кадәрге балаларны колачлый. Бу исә техник иҗатка башлангыч сыйныф укучыларын актив рәвештә җәлеп итәргә зур мөмкинлекләр ача.

“Гади автомобиль модельләре ярышларында 3–4 нче сыйныф укучылары катнаша. Киләчәктә конкурсны беренче сыйныфтан башлап системалы рәвештә оештыру нияте бар. Балаларның кызыксынуы бик көчле. Шуңа күрә бу юнәлешне алга таба да бергәләп үстерербез дип ышанам”, — дип уртаклашты Раил Яманов.

Укытучы сүзләренә караганда, соңгы елларда катнашучыларның әзерлек дәрәҗәсе сизелерлек арткан. “Без республика дәрәҗәсендәге ярышларда берничә ел элек кенә катнаша башлаган идек. Ул вакытта тәҗрибә дә, әзерлек тә җитәрлек түгел иде. Хәзер исә һәр мәктәп җитди әзерләнә, көчле катнашучылар саны арта. Иң сөенечлесе — ярышларда егетләр белән беррәттән кызларны да күрергә мөмкин. Бу — бик куанычлы күренеш. Республика этабында да лаеклы чыгыш ясарлык укучыларыбыз күп дип саныйм”, — дип белдерде педагог.

Быелгы ярышка Раил Яманов ике укучыдан торган команда белән килгән: икесе дә 5-нче сыйныфта укый. Берсе резиномоторлы модель (РМ) буенча, икенчесе исә электр двигателе белән җиһазландырылган модель (ЭЛ) белән чыгыш ясады. 

Актаныш районында узган әлеге ярышлар укучылар арасында техник иҗатны популярлаштыру, конструкторлык күнекмәләрен үстерү һәм балаларга үз мөмкинлекләрен ачарга шартлар тудыру максатыннан оештырыла. Бәйгеләрдә 7 яшьтән 13 яшькә кадәрге укучылар катнаша, нәтиҗәләр шәхси һәм команда зачётларында билгеләнә.