Ата-ана һәм мәктәп бердәмлеге

            Заман белән бергә атлыйм, вакыт сулышын тоеп яшим, киләчәккә әзерлекле шәхес тәрбиялим дип яшәгән, эшләгән педагогик коллектив һәм ата-аналарга яңа эш төрләрен үзләштерергә, укучылар яратып кулланган гаджетларны, төрле программаларны иярләргә туры килә. 
               Әлеге шартларны истә тотып,  Такталачык урта мәктәбендә гаилә-педагогик коллектив-
укучылар бердәмлеген ныгыту,  эшчәнлекне тагын да җанландыру, хезмәтебезне район, республика күләмендә узучы чараларда чагылдыру максатыннан, ата-аналар комитеты белән тыгыз элемтәдә эшләвебезне дәвам итәбез. 
               Бала иң тәүге тәрбияне гаиләдә ала. Оясында ни күрсә, очканда шул булыр, ди халык. Очып-очып биегән, рәхәтләнеп җырлаган, сәнгатьле, үтемле итеп әдәби әсәрдән өзек укыган баланы  күреп, ирексездән әти-әнисенә, әби-бабасына охшатып куясың. Әлеге дәвамчанлыкны саклау, үстерү максатыннан балаларны әти-әниләре, әби-бабайлары белән бергә төрле чараларда катнаштыру отышлы дип саныйбыз. 
                Хезмәт тәрбиясенең тәүге орлыклары да гаиләдә салына. Бу уңайдан балалар хәрәкәте һәм ата-аналар комитеты белән берлектә оештырылган “Кошларга ярдәм” акциясенә һәр гаилә актив кушылды. Иҗади, берсеннән-берсе матур, бер-берсен кабатламаган җимлекләр күргәзмәсендә  укучылар әти-әниләре белән бергәләп ясаган хезмәт җимешләрен тәкъдим итте. 
                Баласының көндәлек тормышы, сәламәтлеге турында кызыксынган ата-аналар  белән берлектә, “Туклану сыйфатын контрольгә алу буенча ата-
аналар контроле” графигы нигезендә, ай дәвамында мәктәп ашханәсендә булып, ризык сыйфаты, чисталык, санитария нормаларының үтәлеше белән танышуны да традициягә керттек. Ата-аналардан кергән теләк-тәкъдимнәр махсус журналга теркәлә, район, республика ата-аналар комитетына җиткерелә.

Г.МОХТАРОВА, Л.ГАЙСИНАның язмасын тулысынча "Актаныш таңнары" газетасының 16 декабрь саныннан укый аласыз.