Дини тәрбия - яхшылык чыганагы (+ФОТОЛАР)

Дин - кешеләрне дөньяда һәм ахирәттә бәхетле итәр өчен Аллаһ тарафыннан пәйгамбәрләр аркылы кешеләргә ирештерелгән илаһи әмерләр һәм тыюлардыр. Һәртөрле тәрбиянең башы-ачкычы булып Аллаһны тану һәм аның кануннары буенча эшләргә өйрәнү тора. Дин балаларда ышаныч тәрбияләүдә дә зур терәк. Бүген бик күпләрнең тормышта югалып калулары, сынауларны үтә алмаулары, эчкечелеккә бирелүләре ышанычлары булмаудан килә. Кеше тормыштан туймасын, кыенлыклар алдында югалып калмасын , дисәк, Аллаһка ышануны бала вакытта ук тәрбияләргә һәм бу ышаныч гомер буе югалмасын өчен бөтен көчне куярга кирәк. Шушы максатларны күздә тотып һәр елдагыча балаларның язгы каникул вакытында районыбыз мәчетләрендә дини укулар оештырылды. Бүләк мәчетендә балаларга дини гыйлем нигезләрен районыбызның Татар Суыксу авылы имамы Нур хәзрәт Хөсәенов аңлатты.