Ат көтүе боз астына төшеп киткән

Ат көтүе елга аша чыгып барганда, боз ярыла башлаган һәм хайваннар суга төшеп киткән. Унбер ат чак кына суга батып үлми калган. Әлеге хәл турында «Башкортстан» телевидениесе хәбәр итте.

Бу вакыйганы атлар асраучы Сәгыйтҗан Идиятуллин видеога төшереп алган. Фермер сүзләренчә, һава торышы тотрыклы булмау сәбәпле, боз бик уалучан һәм юка. «Атлар боз өстенә кереп китте. Гадәттә бу урында боз калынлыгы ярты метр чамасы була», — дип сөйли ир-ат.

Бәхеткә, атларның боз астына китә башлавын кешеләр тиз күреп алган. Коткару операциясе бик оператив оештырылган. Атларны баулар ярдәмендә, кран һәм махсус техника белән тартып чыгарганнар.

Сәгыйтҗан Идиятуллин әлеге кадрларны инстаграм челтәрендәге сәхифәсенә куйды. Фермер сөенече белән уртаклаша. «Аллаһка шөкер, бар да яхшы, атларның бөтенесен дә коткардык», — ди Сәгыйтҗан.

Социаль челтәр кулланучылар да борчылуларын, кадрларны ахырына кадәр йотлыгып карауларын яза.

Чыганак