Зур төзелешләр илендә: Ленар Зарипов җентекләп районыбыздагы төзелешләр белән танышты

Бүген Актаныш районы башлыгы Ленар Зарипов, Башкарма комитет җитәкчесе Рөстәм Ильясов һәм инфраструктур үсеш өчен җаваплы башка иптәшләр районыбыздагы төзелеш эшләре белән танышты.

Җиңүнең 30 еллыгы урамындагы футбол манежына нигез салынуга әле күптән түгел генә. Шуңа да кармастан бик тиздән заманча, иркен һәм матур объект үз ишекләрен ачачак. Җитәкчеләр бүген төзелеш эшләрен тизләтү буенча үзара фикер алышты.

Спорт мәйданчыгының ишек алдын матурлау, төзекләндерү беренчел бурыч. Газ казаннарын да урнаштырасы бар әле. Шулай ук автомобильләр өчен тукталыш ясау да планлаштырыла. Аны генераль подряд компаниясе белән беррәттән үзебезнең коммуналь оешмалар башкарачак. 

Актаныштагы кебек спорт манежы республикабызның Азнакай, Апас районнарында сафка баса. Алдагы елларда Минзәлә һәм башка районнарда төзелеп кулланылуга тапшырылды. 

Актаныштагы спорт мәйданчыгы Казанның "Универсал" ҖЧҖ төзүчеләре көче белән төзелә.

Район җитәкчелеге Яңа Әлем авылындагы мәдәният сарае һәм Иске Идел ярындагы пляждагы эшчәнлекне дә карады.