7 ноябрь тарихыннан: Бүген Октябрь революциясе көне
Дөнья тарихына зур йогынты ясаган һәм тирән эз калдырган сәяси вакыйгага 107 ел. 1917 елның 25 октябрендә (яңа стиль белән – 7 ноябрьдә) Петроградта Бөек Октябрь социалистик революциясе була. Нәтиҗәдә, Вакытлы хөкүмәт бәреп төшерелә һәм властька күпчелекне большевиклар тәшкил иткән II Бөтенрусия Советлар съезды килә. Революция башында Владимир Ульянов (Ленин) һәм башкалар тора. Октябрь революциясе – дөнья тарихына зур йогынты ясаган XX гасырның зур әһәмияткә ия булган сәяси вакыйгаларының берсе. Нәтиҗәдә, Русия халкының язмышы гына түгел, җәмгыять һәм кеше хокуклары да үзгәрешләр кичерә.
Әлбәттә, революциянең икенче көнендә үк халык мул һәм имин тормышта яши башлады дисәк, дөрес булмас. Чөнки Октябрь революциясеннән соң илдә Гражданнар сугышы башлана. Илебез халкы, “аклар” һәм “кызыллар”га бүленеп, кан койды. Шуңа карамастан, революция уңай үзгәрешләргә китерә. Эшчеләр, крестьяннар озак еллар дәвам иткән коллыктан котыла. Яңа шартлар буенча бер кеше икенчесен эксплуатацияли алмый. Социаль изү һәм милли тигезсезлек юкка чыгарыла. Моңа кадәр эшче көч буларак кына файдаланылган гади халыкка игътибар арта. Наданлыкны бетерү өчен җитди чаралар күрелә, сәламәтлек саклау өлкәсендә шактый уңай үзгәрешләр була.
Тарихчылар фикеренчә, XX-XXI гасырларда күпчелек сугышларның, хәрби конфликтларның, илләрдәге махсус рәвештә оештырылган үзгәртеп коруларның сәбәбе уртак. Аларның күпчелеге табигый байлыклар булган территорияләрне яңадан бүлү белән бәйле. Революциягә кадәр Русия җирләренә Бөек Британия, АКШ, Германия һәм башка илләр кызыккан була. Революция булмаса, икътисады үсешмәгән, аягында көч-хәл белән басып торган илебезнең язмышы аяныч булыр иде.
Русиядәге Октябрь революциясе Европа, Азия һәм Латин Америкасы илләре революционерларын да дәртләндерә. Нәтиҗәдә, изелеп, коллыкта, ач-ялангач яшәүче бик күп халыклар азатлык яулый.
Бүген җәмгыятьтә 102 ел элек тормышыбызны тамырдан үзгәрткән вакыйга турында төрле фикерләр яши. Кайберәүләр, революция булмаса, яхшырак яшәгән булыр идек, дип уйлый. Нәрсә генә дисәләр дә, ил тормышында Октябрь революциясе мөһим эз калдырды. Сигез сәгатьлек эш көне, ай саен түләнүче хезмәт хакы, отпуск, ял көннәре, шифаханәләргә юлламалар... Ягъни хезмәт кешесенә хөрмәт революциядән соң күрсәтелә башлый.
Совет чорында 7 ноябрь “календарьда кызыл көн” булып исәпләнә иде, ул елларда бу көн зур бәйрәм буларак билгеләп үтелде. Хәзер Октябрь революциясе көне календарьга бәйрәм көне булмаса да, өлкән буын вәкилләре йөрәгендә ул һаман да зур бәйрәм буларак яши.
7 ноябрь хатирәләр яңарту һәм үткәннәрне искә төшерү көне ул.
Следите за самым важным и интересным в Telegram-каналеТатмедиа
Читайте новости Татарстана в национальном мессенджере MАХ: https://max.ru/tatmedia
Нет комментариев